Hrafn frá Össuri til Gosfélagsins

Í tilkynningu kemur fram að Hrafn mun leiða uppsetningu nýrra framleiðslulína félagsins og í framhaldinu bera ábyrgð á skipulagningu og daglegri stýringu framleiðslu á vörulínum þess.

„Við erum afar lánsöm að hafa fengið Hrafn til liðs við okkur í Gosfélaginu. Reynsla hans af framleiðsluferlum og stjórnun mun án efa styrkja starfsemi félagsins og styðja við þá uppbyggingu sem fram undan er,“ segir Brynjar Freyr Valsteinsson, framkvæmdastjóri Gosfélagsins.

Samkvæmt tilkynningu er Hrafn með meistaragráðu í framleiðsluverkfræði og stjórnun frá Kungliga Tekniska Högskolan (KTH) í Svíþjóð og bakkalárgráðu í vélaverkfræði frá Boston University. Hann er jafnframt sérfræðingur í stefnumótun og skipulagi fyrirtækja. Undanfarin ár starfaði hann hjá Össuri þar sem hann bar ábyrgð á CNC-framleiðslu fyrirtækisins á Íslandi og á heimsvísu.

„Það er afar spennandi að fá að taka þátt í uppbyggingu framleiðslu hjá Gosfélaginu. Félagið hefur metnaðarfull áform á dagvörumarkaði og ég hlakka til að takast á við þau verkefni og áskoranir sem fram undan eru,“ segir Hrafn.

Í tilkynningu segir um Gosfélagið að það sé nýr íslenskur framleiðandi sem hafi síðasta haust  tekið yfir sölu og dreifingu á Klaka og að félagið sé með í undirbúningi uppsetningu eigin framleiðslu. Fólk megi búast við nýjum vörulínum frá Gosfélaginu snemma sumars.