„Ég held ég sé komin með nóg af karl­mönnum í bili“

Fleten sagði við norska ríkisútvarpið eftir gönguna að hún hefði á köflum orðið svo svekkt á meðan á níutíu kílómetra langri göngu stóð að hún hefði næstum misst móðinn.

Ástæðan: Hún lenti á eftir hægfara karlkeppendum. Í Vasagöngunni er það nefnilega þannig, ólíkt flestum SkiClassics-göngum, að konur og karlar ræsa á sama tíma.

Það leiddi til óreiðukennds fyrri hluta göngunnar fyrir þennan 33 ára langgöngusérfræðing.

Ráskaflinn varð mjög slæmur

„Ráskaflinn varð mjög slæmur, því ég stóð alveg úti til vinstri og allt í einu voru engin spor. Þess vegna kom ég mjög illa inn í brekkuna. Þegar ég barðist upp lenti ég í vandræðum með hóp karla sem varð eins og tappi þar sem ég hafði ætlað að fara hratt,“ sagði Emilie Fleten.

Fleten lýsir því sem erfiðri stöðu þar sem karlarnir fóru of hægt í brekkunum upp á við en runnu svo frá henni eða fram úr henni aftur í brekkunum niður á við.

„Ég var grátklökk nokkrum sinnum á meðan á göngunni stóð því það stoppaði allt í öllum brekkum. Og svo varð þetta eins og harmonikka,“ lýsir hún.

Þetta var alveg hræðilegt

Staðan virtist vonlaus. „Þetta var alveg hræðilegt. Ég held ég sé komin með nóg af karlmönnum í bili. Þetta var algjör óreiða. Ég er glöð að þetta endaði með sigri, því þetta virtist frekar vonlaust á meðan á því stóð,“ sagði Fleten.

Emilie Fleten var í sérflokki í Vasagöngunni en þetta er þriðji sigur hennar í Vasagöngunni. Hún sigraði einnig í Marcialonga-göngunni fyrr á þessu ári.

Í karlaflokki var það Svíinn Oskar Kardin sem var fyrstur í mark en ekki gekk allt eins og í sögu hjá Svíanum á sunnudag.

Vasagangan er lengsta og fjölmennasta almenningsganga í heimi og kemur skíðafólk hvaðanæva að úr heiminum til að spreyta sig á þessari 90 kílómetra göngu. Gangan var haldin í fyrsta sinn árið 1922 og er talin einn stærsti þolraunaviðburður skíðagönguíþróttarinnar á heimsvísu.