Orri með slitið kross­band og þarf í að­gerð

Hann verður því ekki meira með á yfirstandandi tímabili en Orri var borinn meiddur af velli á æfingu íslenska landsliðsins í Ásgarði í gær. Liðið undirbýr sig nú fyrir tvo leiki gegn Litáen heima og að heiman í undankeppni HM en fyrri leikurinn fer fram í Laugardalshöll á morgun. 

„Að loknum myndatökum er það orðið ljóst að krossband er slitið og þarf hann í aðgerð. Orri mun því ekki spila meira með Stjörnunni á þessu tímabili. Vonbrigði okkar eru mikil en þekkjandi Orra þá kemur hann sterkur til baka að endurhæfingu lokinni,“ segir í tilkynningu Stjörnunnar. 

Landsliðsmaðurinn öflugi féll til jarðar á æfingu landsliðsins þegar hann fékk slink á hnéð undir lok æfingar. Þögn sló á salinn og Orri lá um nokkurra mínútna skeið og hlaut aðhlynningu læknis áður en liðsfélagar hans báru hann inn í klefa.

Um gífurlegt áfall er að ræða fyrir íslenska landsliðið og Stjörnuna en Orri er einn af burðarásunum í liði Íslandsmeistaranna með 18,7 stig að meðaltali í leik.