Segist hafa rætt tvisvar við prinsinn í gini ljónsins

Prinsinn fyrrverandi var handtekinn í gær vegna gruns um að hann hafi nýtt sér stöðu sem erindreki bresks viðskiptalífs árið 2010 og lekið trúnaðargögnum til vina sinna í bankageiranum. Breska blaðið Telegraph greindi frá því að meðal þess væri minnisblað frá breska fjármálaráðuneytinu um stöðu mála vegna Icesave deilunnar sem hafi áframsent á félaga sinn.

Kemur fram í tölvupóstsamskiptum ritara prinsins fyrrverandi að prinsinn hafi rætt við forsætisráðherra Íslands í Davos í Sviss það árið. Ljóst er að þar er ruglast og átt við forseta Íslands enda var Ólafur Ragnar Grímsson á fundinum en ekki Jóhanna Sigurðardóttir þáverandi forsætisráðherra. Óskaði Andrew í kjölfar fundarins með Ólafi eftir uppfærðu minnisblaði um stöðu mála milli Bretlands og Íslands. Áframsendi hann það svo á félaga sinn Jonathan Rowland þáverandi forstjóra Banque Havilland sem hafði nýlega keypt eignir af Kaupþingi eftir bankahrun.

Hafi rætt við Andrew í gini ljónsins

„Ég veit nú ekkert um tölvupósta Andrew en ég fór til Davos í janúar 2010 til þess að verja málstað Íslands þegar Icesave deilan var í hámæli og hitta þar fjölda manna og þessum samtölum og viðburðum er ítarlega lýst í bók sem ég gaf út fyrir einu og hálfu ári síðan í sérstökum kafla ef ég man rétt,“ segir Ólafur Ragnar í samtali við Vísi.

„Meðal annars fór ég í stórt samkvæmi sem breska sendinefndin hélt til þess að fara bara beint í gin ljónsins og ræða við breska forystumenn um málstað Íslands og hitti þar meðal annars Alistair Darling sem þá var fjármálaráðherra og einn af andstæðingum Íslands í þessu máli. Gestgjafinn var Andrew prins sem þá var sérstakur fulltrúi Breta og er þessum viðburði ítarlega lýst í bókinni minni, þannig þetta er ekki búið að vera neitt leyndarmál nema síður sé.“

Hélt uppi málstað Íslands

Ólafur segist hafa rætt við prinsinn tvívegis og þá innan um annað fólk. Þar hafi hann fyrst og fremst nefnt málstað Íslands og að Bretar hefðu engan lagalegan rétt til að ganga fram í Icesave málinu eins og þeir hafi gert á þessum tíma.

„Ég ræddi það ekki bara við hann heldur marga aðra eins og legið hefur fyrir í nokkurn tíma opinberlega á Íslandi. Svo veit ég ekkert hvað hann gerði eftir þetta, ég hef enga hugmynd um það.“

Ólafur er nú staddur í San Francisco á stífum fundarhöldum meðal annars vegna Hringborðs Norðurslóða sem fram fer í Róm í byrjun mars en Ólafur er auk þess nýkominn af árlegri öryggisráðstefnu í Munchen. Hann segist þannig ekki hafa haft tíma til að fylgjast fylgst með máli fyrrverandi prinsins öðruvísi en rétt í fréttum.

„Eftir því sem ég hef lesið, án þess að vita nokkuð meira, þá hefur hann beðið um einhverjar upplýsingar frá bresku ríkisstjórninni og sent þær áfram til einhverra manna sem ég veit ekkert um, en það byggist ekkert á því sem ég sagði, ég var bara að koma því á framfæri við hann að allar aðgerðir og málflutningur Breta væru ólöglegar og ósanngjarn og ætti ekki rétt á sér, vegna þess að ég taldi mikilvægt eins og ég gerði í samtali við aðra ráðamenn að koma röksemdum Íslendinga á framfæri, en haða upplýsingar hann svo fékk frá breskum stjórnvöldum hef ég ekki hugmynd um.“