Á­sakaður um al­var­legt of­beldi gegn óléttri kærustu sinni

Rice hefur áður komist í kast við lögin og tók út sex leikja bann í byrjun þessa tímabils eftir að hafa verið dæmdur sem orsakavaldur að alvarlegu bílslysi árið áður.

Nú er hann ásakaður um enn alvarlegri hluti. Dacoda Jones, fyrrverandi kærasta hans, lýsir í ákærunni ofbeldinu sem Rice á að hafa beitt.

Þar er hann sagður hafa ítrekað beitt hana andlegu og líkamlegu ofbeldi, auk þess að hafa haldið margsinnis framhjá henni í átta ára sambandi þeirra.

Ástandið hafi verið sem verst á tæplega tveggja ára tímabili frá 2023 til 2025 en Jones segir hann meðal annars hafa barið hana til óbóta, kyrkt hana, klórað og sparkað í hana. Verst af öllu þykir sú staðreynd að Jones var ólétt á þeim tíma.

Í síðasta mánuði birti Jones myndir af sér illa marinni á Instagram en færslunni hefur verið eytt.

Stjórnarmenn Kansas City Chiefs eru meðvitaðir um málið en hafa ekki tjáð sig opinberlega.

Rashee Rice hefur heldur ekki tjáð sig opinberlega um málið. Lögfræðingur hans tjáði sig í gær en lýsti ekki beint yfir sakleysi skjólstæðings síns, heldur sagði hann málið þurfa að fara sinn lagalega farveg.