Vann Ólympíugull á af­mælis­daginn sinn: „Ég gat ekki hætt að gráta“

Það gerði sigurinn enn sérstakari að Su Yiming fagnaði um leið 22 ára afmælisdeginum sínum.

Su vann þarna sín fjórðu verðlaun á ferlinum á sínum öðrum Ólympíuleikum. Fyrsta ferð hans skilaði honum 82,41 stigum, sem reyndist nóg þar sem engum keppinaut tókst að gera betur. Hann var eini keppandinn af tólf í úrslitum sem lauk öllum þremur ferðum sínum í gegnum handrið og stökk brautarinnar án þess að detta eða gera stór mistök.

Su, sem var barnaleikari áður fyrr, sló í gegn á Ólympíuleikunum í Peking árið 2022 þegar hann vann gull í stökki af stórum palli og silfur í brekkukeppninni. Í síðustu viku vann hann brons í stökki af stórum palli í snjóbrettagarðinum í Livigno og hefur nú tryggt Kína tvenn af þeim sjö verðlaunum sem landið hefur unnið á Ítalíu.

Su felldi tár, að því er virtist af tilfinningalegri útrás, eftir síðustu tilraun sína, þar sem hann bætti ekki fyrstu ferðina.

Hann þurfti að horfa á sjö aðra keppendur reyna við lokaferð sína en þeir duttu allir eða fengu ekki nógu há stig. Gullið var hans.

„Ég áttaði mig á því að þetta væri síðasta ferðin mín á Ólympíuleikunum í Mílanó,“ sagði Su.

„Það kom bara upp í hugann á mér og þá fór ég að hugsa um að þetta væri afmælisdagurinn minn, foreldrar mínir væru hér að styðja mig og þjálfararnir mínir, allir hér að styðja mig. Tilfinningarnar bara komu og ég gat ekki hætt að gráta,“ sagði Su.

Hasegawa varð annar með besta stigafjölda sinn, 82,13, og bætti þar með við sjö snjóbrettaverðlaun Japans í Livigno.

Bandaríski keppandinn Jake Canter, 22 ára, vann bronsverðlaunin á sínum fyrstu Ólympíuleikum.