Lifir draumurinn eða raun­gerist leðju­slagur á botninum?

Staða Þórs Þor­láks­hafnar í Bónus deildinni er erfið en á sama tíma á liðið enn mögu­leika á því að koma sér inn í úr­slita­keppnina þrátt fyrir að vera í fallsæti fyrir leiki kvöldsins.

Fjögur stig muna á Þór Þor­láks­höfn og liðunum sem eru í baráttunni um síðustu sætin í úr­slita­keppni deildarinnar. Leikjunum, þar sem hægt er að sækja mikilvæg stig, fer hins vegar fækkandi. Aðeins sex um­ferðir eru eftir af deildar­keppninni.

„Þetta er gríðar­lega mikilvægur leikur fyrir okkur,“ segir Lárus, þjálfari Þórsara í sam­tali við Vísi um leik kvöldsins gegn ÍR en Þórsarar unnu fyrri leik liðanna og gætu því verið með inn­byrðis viður­eignir á ÍR þegar talið verður upp úr pokanum við lok deildar­keppninnar.

„Með sigri getum við kannski lyft okkur upp úr fallsæti og ef við látum okkur dreyma um úr­slita­keppni þá þurfum við líka á sigri að halda þar sem að ÍR er eitt af þeim liðum sem við erum að elta þar.

Staðan er þannig að ef við ætlum að reyna komast í úr­slita­keppnina þá þurfum við að vinna. Ef við töpum í kvöld þá verðum við í leðju­slagnum á botninum.“

Og Þórsarar mæta til leiks í kvöld, eftir hlé í Bónus deildinni vegna úr­slita­helgar í bikar­keppninni, með breyttan leik­manna­hóp. Nýr ís­lenskur leik­maður, Haukur Davíðs­son er mættur til Þor­láks­hafnar og þá hefur liðið fengið inn nýjan bandarískan leik­mann í stað Jacoby Ross, sá heitir Dachon Bur­ke og spilaði síðast í næ­stefstu deild Ís­rael.

„Hann lítur bara ágæt­lega út, spilaði síðast leik í desember í Ís­rael,“ segir Lárus um stöðuna á Bur­ke. „Hann er kannski ekki í bestu leikæfingunni en alls ekkert af­leitri, kemur inn með svolítið öðru­vísi leikstíl en Jacoby Ross. Hann er tölu­vert betri varnar­maður, há­vaxnari og betri í því að ráðast á körfuna. Bur­ke er kannski ekkert ólíkur Jacob Fal­ko hjá ÍR og kemur með eitt­hvað annað að borðinu hjá okkur.“

En hvað þurfa Þórsarar að hafa á hreinu varðandi sinn leik til þess að sækja sigur í greipar ÍR-inga í Breiðholtinu?

„Þetta dæmi­gerða. Mæta í Skógar­selið, koma með meiri baráttu en ÍR. Það er lykillinn að mínu mati. ÍR er lið sem er þekkt fyrir mikla baráttu, ef við náum að jafna þá baráttu eða vinna hana, þá eigum við mögu­leika á sigri í kvöld.“

Leikur ÍR og Þórs Þorlákshafnar hefst klukkan korter yfir sjö í kvöld og verður sýndur í beinni útsendingu á Sýn Sport Ísland 5. Hægt verður að fylgjast með öllu því helsta úr leikjum kvöldsins samtímis í Skiptiborðinu á Sýn Sport Ísland.