Samningar sem tryggja 1,8 milljarð króna í íþrótta­starf

Stærstur hluti upphæðarinnar er vegna styrktarsamnings um afreksíþróttastarf, eða rúmur milljarður króna, en aðrir samningar eru að miklu leyti hugsaðir til þess að jafna tækifæri fólks til íþróttaiðkunar, sérstaklega þeirra sem búa á landsbyggðinni.

Samningarnir eru eftirfarandi:

1. Styrktarsamningur um uppbyggingu afreksíþróttastarfs – 1.035 m.kr.
2. Styrktarsamningur um uppbyggingu svæðisstöðva íþróttahéraða – 52 m.kr.
3. Samningur við Íþrótta- og Ólympíusamband Íslands (ÍSÍ) – 509,4 m.kr. (rekstrarsamningur 177,5 m.kr; stuðningur til reksturs sérsambanda 105 m.kr; Ferðasjóður íþróttafélaga 226,9 m.kr.)
4. Rekstrarsamningur við Ungmennafélag Íslands (UMFÍ) – 138,9 m.kr.
5. Rekstrarsamningur við Íþróttasamband fatlaðra (ÍF) – 40,9 m.kr.

Í tilkynningu á vef Stjórnarráðs Íslands segir að samningur um afreksíþróttir styðji við nýja Afreksmiðstöð Íslands og innleiðingu nýs fyrirkomulags afreksstarfs í íslenskum íþróttum.

Samningur vegna uppbyggingu svæðisstöðvanna átta er talinn mikilvægur til að efla íþróttastarf um allt land. Stöðvunum var komið á koppinn árið 2023 og eiga þær meðal annars að auka framboð íþrótta fyrir börn með fatlanir, erlendan bakgrunn og af tekjulægri heimilum.

Ferðasjóður er sömuleiðis hugsaður til að efla íþróttastarf um allt land, þannig að íþróttaiðkun barna sé minna háð búsetu. Framlag til sjóðsins hækkar um 100 milljónir og er 226,9 milljónir króna.

Þá voru gerðir nýir rekstarsamningar við Íþrótta- og ólympíusamband Íslands, Ungmennafélag Íslands og Íþróttasamband fatlaðra.