FBI birtir myndir af grímu­klæddum manni við heimili Guthrie

Átta dagar eru síðan hin 84 ára gamla Nancy Guthrie hvarf af heimili sínu í Tucson í Arizona. Yfirvöld telja að henni hafi verið rænt.

„Í morgun tókst lögreglu að endurheimta þessar áður óaðgengilegu myndir sem sýna vopnaðan einstakling sem virðist hafa átt við myndavélina við útidyr Nancy Guthrie morguninn sem hún hvarf,“ sagði Kash Patel, forstjóri FBI, í yfirlýsingu á samfélagsmiðlinum X.

Hann sagði að yfirvöld hefðu unnið að því að endurheimta myndir úr eftirlitskerfi heimilisins sem „gætu hafa tapast, skemmst eða verið óaðgengilegar af ýmsum ástæðum – þar á meðal vegna þess að upptökutæki voru fjarlægð“.

Mikið hefur verið fjallað um málið í erlendum miðlum síðustu daga. Savannah Guthrie sagði í gær að fjölskylda hennar teldi móður sína enn vera á lífi og ítrekaði ósk sína til allra þeirra sem gætu haft upplýsingar um hvarf hennar.

Fram kom í fréttum í gær að lögreglunni hefði ekki tekist að bera kennsl á neina grunaða eða ökutæki í tengslum við Guthrie.

FBI hefur heitið 50.000 dollurum í verðlaunafé fyrir allar upplýsingar. Það samsvarar um sex milljónum íslenskra króna.