Tók við verð­launum sem sá besti í ár með fjórum dætrum sínum

Stafford fékk 24 af 50 atkvæðum í fyrsta sæti og endaði með 366 stig. Maye fékk 23 atkvæði í fyrsta sæti og endaði með 361 stig. Þetta var jafnasta keppnin síðan Peyton Manning og Steve McNair deildu verðlaununum árið 2003 enda munaði í raun bara einu atkvæði á þeim.

Á sínu sautjánda tímabili í NFL-deildinni varð hinn 37 ára gamli Stafford elsti leikmaður í sögu NFL til að vinna sín fyrstu MVP-verðlaun. Hann varð einnig þriðji elsti leikmaðurinn til að vinna verðlaunin, á eftir Tom Brady (2017) og Aaron Rodgers (2021).

Stafford kom upp á svið til að taka við verðlaununum ásamt fjórum dætrum sínum sem allar voru í eins svörtum og hvítum kjólum. Það er óhætt að segja að hann hafi brætt nokkur hjörtu með því enda mjög falleg stund.

„Þið eruð ótrúlegar klappstýrur fyrir mig“

Hann þakkaði liði sínu og geymdi eiginkonu sína og dætur þar til síðast: „Þið eruð ótrúlegar klappstýrur fyrir mig. Ég kann vel að meta það. Ég er svo glaður að hafa ykkur á leikjunum á hliðarlínunni með mér og ég get ekki beðið eftir að þið hvetjið mig áfram á næsta ári þegar við verðum að rústa þessu,“ sagði Matthew Stafford.

Þetta var leið Staffords til að tilkynna að hann myndi snúa aftur á næsta tímabili eftir að hafa íhugað að hætta.

Síðustu tvo mánuði venjulegs leiktímabils skiptust Stafford og Maye mörgum sinnum á um að vera með bestu líkurnar á að vinna MVP-verðlaunin, en Stafford varð sigurstranglegastur eftir átjándu og síðustu vikuna. Hann var einnig valinn í fyrsta lið AP All-Pro í fyrsta sinn á ferlinum.

Fimmtíu sem kjósa

Nefnd fimmtíu fjölmiðlamanna víðs vegar um landið, sem fjalla reglulega um deildina, lauk atkvæðagreiðslu áður en úrslitakeppnin hófst.

Kjörfólk valdi fimm efstu fyrir átta AP NFL-verðlaun. Atkvæði í fyrsta sæti gáfu 10 stig. Atkvæði í öðru til fimmta sæti gáfu 5, 3, 2 og 1 stig.

Stafford varð fyrsti leikmaðurinn til að vinna MVP-verðlaunin fyrir lið utan tveggja efstu sætanna síðan Adrian Peterson gerði það árið 2012. Frá sameiningu AFL/NFL árið 1970 hafa aðeins átta leikmenn unnið MVP-verðlaunin án þess að vinna sína deild, þar af aðeins tveir leikstjórnendur. Rams tryggðu sér fimmta sætið í NFC-deildinni eftir að hafa endað í öðru sæti í NFC West með 12-5 árangur.

Komst ekki í Super Bowl

Los Angeles komst heldur ekki í Super Bowl eftir tap gegn Seattle Seahawks í úrslitaleik NFC-deildarinnar. Eftir þann ósigur beindist athyglin að framtíð Staffords í NFL-deildinni, en gamla kempan fullvissaði aðdáendur á fimmtudagskvöldið um að hann myndi snúa aftur á sitt ártjánda tímabil.

Josh Allen, leikstjórnandi Buffalo Bills og MVP árið 2024, fékk tvö atkvæði í fyrsta sæti, en Justin Herbert, leikstjórnandi Los Angeles Chargers, fékk hitt. Allen endaði í þriðja sæti í atkvæðagreiðslunni, á eftir honum komu Christian McCaffrey, hlaupari San Francisco 49ers, og Trevor Lawrence, leikstjórnandi Jacksonville Jaguars.

Super Bowl verður í beinni útsendingu á Sýn Sport á sunnudaginn. Lokasóknin verður í beinni, hitar vel upp fyrir leikinn og fylgir honum síðan þar til úrslitin eru ráðin og nýr Super Bowl-meistari hefur verið krýndur.