Breytingar á eigendahópi Glassriver þar sem „gengið hefur á ýmsu“

Tilkynnt var um breytingar á eigendahópnum nú síðdegis. Þar kemur fram að Sena og Arion banki hafi bæst í eigendahópinn hjá fyrirtækinu sem um árabil hafi verið eitt það öflugasta á sviði framleiðslu sjónvarpsþátta á Íslandi. Glassriver hefur komið að mörgum stærstu og þekktustu sjónvarpsverkefnum síðustu ára á borð við Svörtu sanda, HeimaEy og Venjulegt fólk.

Fram kemur í tilkynningunni að aðkoma Arion banka, sem hafi verið viðskiptabanki Glassriver um árabil, sé liður í fjárhagslegri endurskipulagningu félagsins. Samkvæmt heimildum Vísis hefur borið á töfum á launagreiðslum til starfsfólks að undanförnu vegna reksturs félagsins en samkvæmt ársreikningi nam eigið fé og skuldir Glassriver árið 2024 samtals um 1,7 milljarði króna.

Skipst á skin og skúrir

Andri Ómarsson framkvæmdastjóri fyrirtækisins segir í samtali við Vísi að skipst hafi á skini og skúrum í rekstrinum. 

„Þetta er mjög lifandi geiri þannig það hafa komið allskonar áskoranir í gegnum tíðina. Við horfum auðvitað bara til þess, sér í lagi með reynslu Senu og með því baklandi sem þar er og svo aðkomu Arion, sem hefur verið okkar viðskiptabanki til margra ára, að það verði stöðugra land undir fótum fyrir okkur og tækifæri til að takast á við það óstöðuga land sem kvikmyndagerð er. Þannig við horfum björtum augum til framtíðar.“

Hann segir verkefnið framundan vera að endurskipuleggja og halda áfram uppbyggingu á rekstri Glassriver með nýjum eigendum. Fyrirtækið sé með ótalmörg verkefni í framleiðslu og í undirbúningi.

Hve stóran hlut í fyrirtækinu eignast þessir aðilar?

„Það er ekkert sem ég get gefið upp á þessum tímapunkti.“

Hafa orðið tafir á greiðslum til starfsfólks?

„Ég segi bara að almennt hefur gengið á ýmsu. Við erum umfangsmikið fyrirtæki, við erum í mörgum verkefnum á sama tíma og það leiðir af sér mikinn rússíbana, sem þessum geira hefur fylgt. Við höfum leitast við að ná stöðugum fótum undir reksturinn.“