Þing­maður Svíþjóðardemókrata tekin full undir stýri með kókaín í poka

Nyberg var handtekin í sveitarfélaginu Värmdö seint að kvöldi 28. desember og flutt á lögreglustöð í kjölfarið.

Nyberg er samkvæmt fréttinni fyrrverandi lögreglukona og situr í dómsmálanefnd þingsins. Þingkonan er nú grunuð um grófa ölvun við akstur og fíkniefnalagabrot. Málið er rannsakað af sérstakri rannsóknardeild lögreglunnar sem sér um rannsóknir þar sem þingmenn koma við sögu.

Í umfjöllun Aftenposten segir að Katja Nyberg hafi setið á þingi fyrir Svíþjóðardemókrata síðan 2018. Hún eigi sæti í dómsmálanefnd þingsins og sé varamaður í nokkrum öðrum nefndum. Á stjórnmálaferli sínum hefur hún verið áberandi í lögreglu- og dómsmálum og hefur, meðal annars, verið talsmaður Svíþjóðardemókrata í lögreglumálum.