Smá­ríkið í­hugar mál­sókn vegna að­gerða lög­reglu

Í gærkvöldi lokaði lögregla afhendingarstöðum áfengisnetverslana, eins og kom fram í dagbók lögreglu. Meðal þeirra var afhendingarstað Smáríkisins í Bæjarlind. Lögregla lokaði síðast afhendingarstað Smáríkisins á öðrum degi jóla.

Í svari Smáríkisins við fyrirspurn fréttastofu segir að einkennisklæddir lögreglumenn hafi mætt klukkan 23:57 á afhendingarstað í Bæjarlind og sagt starfsmanni að hann hefði átt að loka klukkan 23. Starfsmaðurinn hafi tilkynnt lögregluþjóninum að hann væri hvort eð er að pakka saman og lauk því þar.

Engar sektir hafi verið lagðar á Smáríkið enn sem komið er og ekki tilkynnt um efni nokkurra ákvarðana og á hvaða lagagrundvelli þær byggðust þrátt fyrir að óskað hefði verið eftir því.

Forsvarsmenn Smáríkisins telja lögreglu hafa vegið að sér með umræddum aðgerðum.

„Lögreglu ber að fylgja lögum og reglur stjórnsýsluréttar setja þeim skorður eins og öðrum stjórnvöldum, m.a. um jafnræði og meðalhóf. Sífelldar aðgerðir gagnvart einum aðila af fleiri en 20 vegna starfsemi sem full vitneskja er um, og er í besta falli byggð á óskýrum lagagrundvelli, standast að okkar mati ekki kröfur sem gerðar eru til stjórnvalda.“

Afskiptin hafi verið með svipuðum hætti og á öðrum degi jóla. Þá hafi einkennisklæddir lögregluþjónar mætt á afhendingarstað í Bæjarlind og sagt starfsmönnum að loka. Þá er haft eftir einum lögregluþjóni skipanirnar hafi komið „að ofan“.

Þeir segja að fyrirtækið hafi orðið fyrir tugmilljóna tjóni vegna „þvingana lögreglu“.

„Lögreglan hóf afskipti með þessum hætti fyrirvaralaust nú í desember gegn okkur einum. Okkur var gert að loka, aðrir fá að vera opnir. Þá virðist sem að Nýju vínbúðinni hafi ekki verið gert að loka fyrir heimsendingarþjónustu, sem á sama tíma okkur var gert að loka.“

Spurðir út í fyrirhugaða málsókn sem greint var frá á mbl.is segja þeir forsvarsmenn Smáríkisins hafi ásamt lögmönnum sínum skoðað öll þau úrræði sem standa þeim til boða. 

„Eitt af þeim úrræðum er að höfða mál til að fá úr þessu skorið. Enn sem komið er höfum við ekki fengið nein gögn frá lögreglu né rökstuðning fyrir aðgerðum hennar þrátt fyrir ítrekaðar beiðnir bæði í síma og í pósti. Lögreglan veitir fjölmiðlum upplýsingar en ekki okkur,“ skrifa forsvarsmenn verslunarinnar.

Lögreglustjórinn á höfuðborgarsvæðinu hefur ákært framkvæmdastjóra félags sem heldur utan um rekstur Icelandic Trading Company b.v, sem rekur netsölu með áfengi undir merkjum Smáríkisins.

„Okkur þykir leitt að aðstæður skuli vera með þessum hætti og það um árabil. Það er fyllilega innan valdheimilda ráðherra og ríkisstjórnar að leysa úr þessu og myndu þau spara almenningi stórfé með því einu að draga úr þessari óvissu.“