Innlent

2025 var hlýjasta árið á Ís­landi frá upp­hafi mælinga

Oddur Ævar Gunnarsson skrifar
Svona var umhorfs í Nauthólsvík í lok maí.
Svona var umhorfs í Nauthólsvík í lok maí. Vísir/Lýður Valberg

Árið 2025 var hlýjasta árið á Íslandi frá upphafi mælinga. Meðalhiti í byggðum landsins var 5,2 stig sem er 1,1 stigi yfir meðallagi áranna 1991 til 2020 og hefur aldrei verið hærri. Áður var árið 2014 hlýjasta árið á landsvísu.

Þetta kemur fram í tilkynningu frá Veðurstofunni. Þar segir að árið hafi einkennst af miklum hlýindum. Hiti var vel yfir meðallagi alla mánuði ársins, nema í janúar, júní, október og nóvember.

Maí var langhlýjasti maímánuður frá upphafi mælinga, júlí var hlýjasti júlímánuðurinn (ásamt júlí 1933 sem var jafnhlýr) og desember var þriðji hlýjasti desembermánuður frá upphafi mælinga. Vorið (apríl og maí) var jafnframt það hlýjasta sem skráð hefur verið á landsvísu. Hitabylgjan í maí, sem stóð yfir dagana 13.– 22. maí, var sú mesta sem vitað er um í maímánuði.

Ársmeðalhiti í byggðum landsins. Súluritið sýnir hlýjustu og köldustu árin, ásamt meðaltali áranna 1991 til 2020.

Ný hámarkshitamet sett í einstökum mánuðum

  • Nýtt landsmet í maí: 26,6 stig á Egilsstaðaflugvelli 15. maí.
  • Nýtt landsmet í ágúst: 29,8 stig á Egilsstaðaflugvelli 16. ágúst.
  • Nýtt landsmet í desember: 19,8 stig á Seyðisfirði 24. desember.

Árið var það hlýjasta á mörgum veðurstöðvum, meðal annars í Stykkishólmi þar sem hiti hefur verið mældur samfleytt í 180 ár, allt frá árinu 1845. Þar hafði árið 2016 áður verið það hlýjasta. 

Landsmeðalhiti hvers sólarhrings á árinu 2025 sýndur sem vik frá landsmeðalhita síðustu 10 ára (2015-2025). Hitasveiflur eru alltaf meiri yfir vetrarmánuðina.

Af þeim stöðvum sem hafa mælt hvað lengst var árið einnig það hlýjasta í Reykjavík (af 155 árum ), Bolungarvík (af 128 árum), Grímsstöðum á Fjöllum (af 119 árum), Dalatanga (af 71 ári) og Stórhöfða (af 149 árum) og næsthlýjasta árið á Egilsstöðum (af 71 ári), Teigarhorni (af 152 árum) og Keflavíkurflugvelli (af 74) árum.

Á þessum stöðvum voru það ýmist árin 2014, 2016 eða 2003 sem voru áður þau hlýjustu eða álíka hlý, mismunandi eftir landshlutum.

Ársmeðalhiti í Stykkishólmi frá 1846-2025. Brotna línan sýnir meðalárshita alls tímabilsins, árin sem eru hlýrri en meðaltalið eru merkt með rauðum punkti en þau sem eru kaldari með bláum punkti.
Veður Fréttir ársins 2025

Tengdar fréttir

Desember að komast á lista yfir þá allra hlýjustu

Það stefnir allt í það að desember á landsvísu komist á lista yfir þá allra hlýjustu en hitinn nú er samt nokkuð frá sögulega hlýjum desembermánuði árið 1933. Þetta segir Einar Sveinbjörnsson veðurfræðingur sem segir desembermánuð 2025 líklega verða í þriðja til fjórða sæti yfir þá allra hlýjustu. Hitamet á Stykkishólmi megi teljast með stærstu veðurtíðindum ársins.

Hitabylgjan sú mesta í maímánuði svo vitað sé

Hitabylgjan sem reið yfir landið dagana 13. til 22. maí er sú mesta sem vitað er um í maímánuði hér á landi. Tíu daga í röð mældist hiti 20 stig eða hærri einhvers staðar á landinu og fjöldi hitameta í maímánuði var sleginn. 

Mest lesið


Fleiri fréttir

Sjá meira


×

Mest lesið