Meisturunum fatast flugið „af því hitt liðið er betra“

Spurs eru með gott tak á toppliðinu og unnu jóladagsleikinn með fimmtán stigum, 117-102.

Þetta var í þriðja sinn sem liðin mætast á undanförnum tveimur vikum en Spurs slógu Thunder út úr undanúrslitum NBA bikarsins þann 13. desember með tveggja stiga sigri og liðin mættust síðan aftur á Þorláksmessu þar sem Spurs unnu með tuttugu stigum.

Framan af tímabili virtust meistararnir frá Oklahoma algjörlega óstöðvandi og liðið var borið saman við bestu lið í sögu deildarinnar, Chicago Bulls (72-10) og Golden State Warriors (73-9) en sigurhlutfall þeirra hefur nú farið úr 24-1 yfir í 26-5.

Hins vegar hafa Spurs stigið upp í annað sæti vesturdeildarinnar og eru nú með 23 sigra og 7 töp.

Þetta er líka í fyrsta sinn í fjögur ár, eða síðan Thunder fóru aftur að gera sig gildandi, sem liðið tapar tveimur leikjum í röð með að minnsta kosti fimmtán stigum.

„Við þurfum að verða betri, þú tapar ekki þremur leikjum í röð á svona stuttum tíma nema af því hitt liðið er betra. Við þurfum að verða betri ef við viljum ná markmiði okkar [að verja titilinn]“ sagði verðmætasti leikmaður deildarinnar á síðasta tímabili, Shai Gilgeous-Alexander.

Hann skoraði 22 stig og gaf 4 stoðsendingar fyrir Oklahoma en leikstjórnandi Spurs, De‘Aron Fox, var stigahæstur með 29 stig auk 3 stoðsendinga.

Victor Wembanyama skoraði 19 stig og greip 11 fráköst en hann er enn að jafna sig af meiðslum og spilaði aðeins 26 mínútur.