Ljós­myndir horfnar úr Epstein-skjölunum, þar á meðal ein af Trump

Skjölin sextán voru aðgengileg í gær, að sögn AP, og sýndu meðal annars málverk af nöktum konum. 

Ein skrá var ljósmynd er sýndi stafla af ljósmyndum á skenk og í skúffum. Þar mátti sjá ljósmynd af Trump ásamt Epstein, Melaniu Trump og Ghislaine Maxwell, sem lengi var samstarfskona Epsteins. 

Sjá einnig: Það helsta úr fyrsta skammti Epstein-skjalanna

Dómsmálaráðuneytið hefur ekki gefið upp hvers vegna skrárnar voru fjarlægðar eða hvort það hafi verið gert af ásettu ráði. Talsmenn ráðuneytisins hafa ekki tjáð sig.

Ekki liggur fyrir hvað annað hefur verið tekið niður og hvers vegna. 

Demókratar í eftirlitsnefnd fulltrúadeildarinnar vöktu athygli á myndina sem hvarf í færslu á X og skrifuðu: „Hvað annað er verið að hylma yfir? Við krefjumst gagnsæis fyrir almenning í Bandaríkjunum.“

Skjölin sem birt voru í gær innihalda þúsundir ljósmynda og bæta í raun litlu við þær opinberu upplýsingar sem þegar liggja fyrir um Epstein og mál hans. Skjölin varpa ekki heldur frekara ljósi á tengingar hans við auðuga og áhrifamikla menn vestanhafs eða annarsstaðar í heiminum.