Hætti við að keppa út af hundinum sínum

Bandaríkjamaðurinn Noah Ohlsen ætlaði að vera með en dró sig úr keppni fyrir fyrstu grein mótsins.

Innan við sólarhring fyrir keppni var hann heldur betur tilbúinn í slaginn ef marka mátti færslu hans á samfélagsmiðlum.

„Búinn að skrá mig til leiks og tilbúinn að láta til mín taka. Úrslit World Fitness hefjast á morgun. Níu greinar á næstu fjórum dögum og ég mun gera mitt besta til að gera ykkur stolt,“ skrifaði Noah Ohlsen.

Daginn eftir var komið allt annað hljóð í kappann. Fljótlega fréttist þó af því að Ohlsen hætti við að keppa út af hundinum sínum.

Hundurinn hans heitir Maximus og er þekktur innan CrossFit-heimsins enda elskaður og dáður af eigendum sínum.

Nú er svo komið að Maximus er á síðustu dögum ævi sinnar og Noah vildi frekar fara heim og eyða síðustu dögum Maximusar með hundinum og fjölskyldu sinni.