Vill ekki að kjötkaupmaður tali fyrir hverfið allt

Fyrirhuguð tilfærsla Kaffistofu Samhjálpar á Grensásveg 46 er ein heitasta kartaflan í Smáíbúðahverfinu um þessar mundir. Framkvæmdir voru stöðvaðar í vikunni eftir að ákveðið var að fara í grenndarkynningu á flutningi Kaffistofunnar í kjölfar þess að íbúar lýstu andstöðu sinni við komu Kaffistofunnar og kváðust áhyggjufullir að með opnun hennar yrðu óreglumenn tíðari gestir í hverfinu.

Bryndís, móðir sem býr í Hlíðargerði, segir aftur á móti að einstakar, háværar óánægjuraddir tali ekki fyrir hverfið allt. 

Hverfið taki almennt vel í komu Kaffistofunnar

„Almennt held ég nú að hverfið sé bara mjög jákvætt fyrir þessu að þeir komi þarna á Grensásveginum,“ segir Bryndís í samtali við Vísi. 

„Og við viljum alls ekki að einhver einn kjötbúðareigandi tali svona almennt fyrir hverfið,“ bætir hún við og vísar þar til ummæla Geirs Rúnars Birgissonar, eiganda Kjötbúðarinnar, sem sagði íbúa í hverfinu hafa miklar áhyggjur af komu Kaffistofunnar í hverfið. 

Kaupmaðurinn, sem einnig er formaður húsfélags Grensásvegar 44 til 50, sagði að íbúar óttuðust aukið ónæði og fjölgun innbrota með tilkomu kaffistofunnar og lýsti því að einn viðskiptavinur hafi komið grátandi inn í verslunina vegna málsins.  Bryndís telur það liggja augum uppi að slátrarinn sé aðallega að reyna að gæta eigin hagsmuna.

Reykjavíkurborg þurfi að hætta að lúffa

Bryndís bendir enn fremur á að Samhjálp eigi jafnvel rætur að rekja til hverfisins. Samtökin urðu til við Sogaveg 158 þar sem Georg Viðar Björnsson veitti mönnum skjól í bílskúr hjá sér, samkvæmt vef Samhjálpar.

„Þessi staðsetning finnst okkur mörgum einmitt upplögð og okkur langar að bjóða Samhjálp velkomna á þennan stað sem okkur finnst mjög heppilegur,“ segir hún. 

„Og ég vil að Reykjavíkurborg standi í lappirnar og lúffi ekki alltaf,“ bætir hún við.

„Af því að þetta er búið að vera tveggja ára prósess að finna einhvern stað. Það er alltaf einhver sem vill það ekki í garðinn sinn.“ Hún segir að borgin mætti vera stöndugri að greiða götur Samjálpar.

Engin börn á ferð

Heitar umræður hafa skapast í hverfisumræðuhópnum á Facebook en þar birti Bryndís Eva einmitt færslu þessa efnis þar sem hún brigslaði nágranna sína um fordóma.

„Það eru engin börn sem leika sér á þessu svæði og það vitið þið vel, hættið að bera alltaf saklaus börn fyrir ykkar eigin fordómum,“ skrifaði hún. 

„Svona fyrir utan að börn hafa ekkert nema gott af því að sjá að mannlífið er allskonar. Þið látið hér eins og að sleppa eigi hér lausum einhverjum her uppvakninga, fólkið er ekkert skilið eftir hér í hverfinu heldur skutlað fram og til baka á matarmálstímum, ykkur öllum gjörsamlega að meinlausu,“ bætti hún við. 

Allmargir taka undir með Bryndísi í ummælum undir færslunni, þó ekki allir.  Einn í athugasemdum lýsir þó áhyggjum af því að hópurinn sem leiti í Kaffistofuna sé gjarnan í mikilli fíkniefnaneyslu og með andleg og líkamleg veikindi sem með réttu ættu að vera á sérhæfðum stofnunum.

Sem fyrr segir hafa framkvæmdir verið stöðvaðar til að ráðast í slíka kynningu fyrst. 

Framkvæmdastjóri Samhjálpar sagði við Vísi að áætlað hefði verið að opna Kaffistofuna þann 1. desember en það tefjist í það minnsta um sex vikur vegna grenndarkynningar. Hún sagðist vonast til þess að íbúar skipti um skoðun og að hægt verði að reka starfsemina í sátt.