Óða boðflennan fangelsuð

Johnson Wen, 26 ára Ástrali, hefur gert það að eins konar hobbíi að hlaupa upp á svið á tónleikum, íþróttaviðburðum eða frumsýningum og vera þar til trafala. 

Nýjasti gjörningur Wen átti sér stað þegar söngleikjamyndin Wicked: For Good var frumsýnd 13. nóvember í Singapúr. Hann stökk þá yfir girðingu, hljóp upp að annarri aðalleikkonu myndarinanar Ariönu Grande, tók utan um hana og hoppaði við hlið hennar. 

Cynthia Erivo, mótleikkona Grande, ýtti Wen í burtu áður en öryggisverðir handsömuðu hann. Hann reyndi síðan að klifra aftur yfir grindverkið en var þá rekinn á brott. Seinna sama kvöld var Wen handtekinn við hið fjölfarna Temple-stræti og hefur verið í haldi síðan.

Þoldi loks afleiðingar gjörða sinna

Wen fór fyrir dómara um helgina og krafðist saksóknari viku fangelsis fyrir verknaðinn. Nefndi hann að Wen væri „rað-boðflenna“ og auglýsti gjörninga sína á netinu til að afla sér vinsælda.

Þegar dómarinn spurði Wen hvort hann hefði eitthvað að segja dómnum til mildunar, sagðist hann ekki mundu gera neitt slíkt aftur.

„Er þetta bara í orði en ekki á borði eða er það raunveruleg ætlun þín?“ ku dómarinn hafa spurt.

„Já, ég ætla að hætta,“ á Wen þá að hafa sagt.

Dómarinn dæmdi Wen í níu daga fangelsi og benti á að Wen hefði aldrei áður þurft að takast á við afleiðingar gjörða sinna. 

„Þú virðist vera athyglissjúkur, hugsar bara um sjálfan þig og ekki um öryggi annarra,“ sagði dómarinn um gjörðir Wen. Svo dæmdi hann Wen í níu daga fangelsi fyrir ólæti á almannafæri. Ekki liggur fyrir hvort Wen var einnig gert að greiða sekt.