Barna­barn Donalds Trump: „Ég sló mörg góð högg, bara á ranga staði“

Trump lét taugarnar fara með sig og lék á þrettán höggum yfir pari í frumraun sinni á LPGA-mótaröðinni.

Hún er bara átján ára áhugakylfingur en fékk boð á mótið frá styrktaraðilum en hún er barnabarn Donalds Trump Bandaríkjaforseta og gríðarlega vinsæl á samfélagsmiðlum.

Taugaveikluð Kai Trump fékk tvo tvöfalda skolla og níu skolla á fyrsta hring sínum í Flórída.

Taugaveiklaðri en ég bjóst við

„Ég var klárlega taugaveiklaðri en ég bjóst við, en mér fannst ég slá mörg frábær högg þarna úti. Ég sló mörg góð högg, bara á ranga staði,“ sagði Trump.

„Og þar sem þetta er fyrsta LPGA-mótið mitt veit ég núna hvernig þetta gengur fyrir sig. Mér fannst ég vera svolítið úr takti í byrjun en náði svo taktinum aftur,“ sagði Trump.

Trump hefur aðeins keppt á þremur mótum á þessu ári og er í 461. sæti á styrkleikalista bandaríska unglingagolfsambandsins (American Junior Golf Association).

Hún fékk boð frá styrktaraðila til að keppa á Annika-mótinu en lauk fyrsta degi fjórum höggum á eftir næsta keppanda og nítján höggum á eftir efsta manni, Haeran Ryu frá Suður-Kóreu, sem er á sex höggum undir pari.

Fékk ráð frá Tiger Woods

Kai Trump fékk ráð frá Tiger Woods, fimmtánföldum risameistara, fyrir frumraun sína á LPGA-mótaröðinni en það gerði augljóslega ekki mikið fyrir hana.

„Ég var taugaveikluð allan tímann, það er engin spurning,“ sagði Trump. „Mér fannst ég standa mig nokkuð vel miðað við að þetta var í fyrsta skipti og ég var yngsti keppandinn á mótinu. Ég skemmti mér konunglega þarna úti,“ sagði Trump.

LPGA-mótaröðin sagði að „stór fylgjendahópur og áhrif“ Trumps hjálpaði til við að kynna golf fyrir nýjum áhorfendum, sérstaklega meðal yngri aðdáenda.

Hún er með meira en sex milljónir fylgjenda á samfélagsmiðlum og setti nýlega á markað eigið fata- og lífsstílsmerki.