Hvatningar­verð­laun gegn ein­elti af­hent á Laugar­vatni

Fjölmenni kom saman í Menntaskólanum að Laugarvatni í morgun þegar hvatningaverðlaunin voru afhent en það kom í hlut Páls Óskars Hjálmtýssonar að tilkynna hver fengi verðlaunin í ár en það er Gunnlaugur Víðir Guðmundsson, forstöðumaður Gleðibankans, sem er félagsmiðstöð fyrir unglinga í Reykjavík.

Dagur gegn einelti , sem var reyndar 8. nóvember, hefur verið haldinn árlega síðan 2011 og er mikilvæg áminning um að við berum öll ábyrgð á öruggu og hlýju skólasamfélagi.

„Takk kærlega, þetta er gríðarlegur heiður. Ég tek þessu, sem viðurkenningu fyrir mín störf og er mjög mjög þakklátur,“ sagði Gunnlaugur Víðir meðal annars í þakkarávarpi sínu.

Kór menntaskólans söng við athöfnina undir stjórn Stefáns Þorleifssonar og svo voru haldin nokkur ávörp. Freyja Rós hjá menntaskólanum hlaut verðlaunin á síðsta ári og þess vegna var athöfnin þar í dag.

Var erfitt að bera þennan titil í ár eða var það létt?

„Bæði og því þetta er svolítil pressa en auðvitað er bara gott að hafa þessa pressu, við þurfum að halda áfram og standa okkur,“ segir Freyja.

Hvað getur þú sagt mér um verðlaunahafana í ár?

„Hann var valinn einróma af dómnefnd og er að standa sig frábærlega í sínu starfi,“ segir Sigurður Sigurðsson, framkvæmdastjóri Heimilis og skóla.

Sigurður minnir á ábyrgð foreldra þegar einelti er annars vegar.

„Já, að tala við börnin um mikilvægi þess að vera góð við alla og bjóða öllum með og vera opinn fyrir því ef við fáum símtalið um að barnið okkar sé kannski gerandi að vinna í því.“

Dagskránni á Laugarvatni lauk svo með lagi frá Páli Óskari og Benna Hemm Hemm.