„Lafufu“ geti verið hættu­leg

Í tilkynningu á vef HMS segir að Labubu tuskudýr hafi orðið mjög vinsæl að undanförnu. Í kjölfarið hafi myndast markaður fyrir eftirlíkingar sem kallast Lafufu. Erlendir eftirlitsaðilar og tollayfirvöld í EU hafi stöðvað fjölda sendinga með eftirlíkingum af Labubu þar sem þær uppfylltu ekki öryggiskröfur sem gilda um leikföng. Því sé varað sérstaklega við eftirlíkingum á Labubu tuskudýrunum. Um daginn hafi um 35.000 stykki af Lafufu verið gerð upptæk í Portúgal og nýlega hafi sænski tollurinn lagt hald á yfir 5.300 Lafufu tuskudýr.

Í prófunum hjá sænsku efnastofnuninni hafi bönnuð efni fundist í flestum eftirlíkingunum. Efni af tegundinni þalöt, aðallega DEHP, hafi fundist í 5 af 7 leikföngum sem prófuð voru í Svíþjóð. Þalöt séu notuð til að mýkja plast og geti truflað hormónastarfsemi, haft áhrif á á frjósemi við langvarandi útsetningu og losnað úr efninu með tímanum og borist, til dæmis, í ryksöfnun á heimilum.

„Fólk er því sérstaklega varað við að kaupa eftirlíkingar á Labubu tuskudýrum. Eigendur þeirra eru hvattir til að farga þeim á öruggan hátt.“