Stelpurnar okkar byrja á erfiðasta glugga sögunnar

Íslenska kvennalandsliðið í fótbolta lenti í algjörum martraðarriðli í undankeppni HM 2027 enda í riðli með bæði heimsmeisturum Spánar og Evrópumeisturum Englands.

Undankeppni fer fram frá mars til júní á næsta ári og Knattspyrnusamband Evrópu, UEFA, hefur nú staðfest leikjaniðurröðun í riðlum A-deildar kvenna í undankeppni HM 2027.

Stelpurnar okkar þurfa að byrja á tveimur erfiðustu leikjunum því Ísland byrjar á tveimur útileikjum í mars, gegn Spáni og Englandi.

Á sama tíma og íslensku stelpurnar heimsækja heimsmeistarana á Spáni þá spilar England útileik á móti Úkraínu áður en þær taka á móti Íslandi fjórum dögum síðar.

Tveir heimaleikir verða í landsliðsglugganum í apríl, gegn Úkraínu og Englandi. Áður en ensku stelpurnar koma til Íslands þá fá þær heimsmeistara Spánar í heimsókn.

Íslensku stelpurnar enda svo á útileik gegn Úkraínu og heimaleik gegn Spáni í júní. Spænska landsliðið spilar heimaleik við England fjórum dögum áður en liðið kemur til Íslands.