Hætta rekstri tveggja skipa í hag­ræðingar­skyni

Í tilkynningu þess efnis á vef Síldarvinnslunnar segir að auk þess að hætta útgerð ísfisktogarans Gullvers NS 12 hafi Síldarvinnslan einnig ákveðið að hætta útgerð ísfisktogarans Jóhönnu Gísladóttur GK 357, sem gerður hafi verið út af Vísi ehf. í Grindavík. Skipin séu 42 og 27 ára gömul, smíðuð 1983 og 1998.

Ákvörðunin sé áfangi í endurskipulagningu á starfsemi samstæðunnar sem nauðsynlegt hafi verið að grípa til. Uppsögn tveggja áhafna nái til fjörutíu sjómanna. Gert sé ráð fyrir að hluti þeirra fái pláss á ísfisktogaranum Birtingi NK og öðrum skipum samstæðunnar. Birtingur NK verði skipaður tvöfaldri áhöfn. Síldarvinnslan hafi fest kaup á Birtingi NK í lok árs 2024 frá Skinney-Þinganesi hf.

Erfiðar ákvarðanir

„Ákvarðanir sem kalla á uppsagnir eru ávallt flóknar og erfiðar, en Síldarvinnslan leggur sig fram um að milda áhrif aðgerðanna eftir fremsta megni. Þær eru hins vegar nauðsynlegar til að tryggja og viðhalda samkeppnishæfni félagsins og starfsemi til framtíðar. Rekstrarumhverfi hefur verið að breytast, útlit fyrir frekari samdrátt aflaheimilda. Við erum að leggja skipum sem komin eru til ára sinna,“ er haft eftir Gunnþóri Ingvasyni, forstjóra Síldarvinnslunnar.

Loks segir að sjómennirnir njóti sex mánaða uppsagnarfrests og bæði skip verði gerð út þann tíma þar til Birtingur er tilbúinn til útgerðar. Þá verði þrjú uppsjávarskip gerð út af Síldarvinnslunni og þrír ísfisktogarar, tvö línuskip, frystitogari og bátur í krókaflamarki.