Ætlar í pásu frá giggum

„Ég held að ég taki mér smá pásu frá því að gigga eftir þessa helgi. Klári mögulega út ágúst og setji síðan allan fókusinn minn á R8iant,“ segir Aron en fyrirtækið framleiðir steinefnahylki.

„Ég held ég sé búinn að keyra mig aðeins of hart út í aðeins of langan tíma,“ segir Aron. 

Þá segist hann spenntur fyrir því að koma fram á tónleikum helgarinnar en hann kemur fram á Þjóðhátíð í Eyjum á laugardaginn og Einni með öllu á Akureyri á sunnudaginn. 

Að auki sé hann spenntur fyrir að fara með fullu fjöri í steinefnaframleiðsluna. 

„Ég er búinn að vera að hugsa þetta ógeðslega lengi og nú er þetta að fara af stað og gengur ógeðslega vel. Við erum rétt að byrja þetta,“ segir Aron. 

Það skaut aðdáendum Arons skelk í bringu þegar hann hneig niður og fékk flogakast á tónleikunum í Hjarta Hafnarfjarðar á dögunum. Hann sagði atvikið óvænt og óþægilegt í færslu á Instagram en honum liði vel þrátt fyrir að vita ekki enn hvað skeði.