Hótar að stöðva byggingu nýs vallar ef liðið skiptir ekki um nafn

Lið Washington Commanders hefur leikið heimaleiki sína á Northwest-leikvanginum í Landover, Maryland undanfarin ár. Landover er staðsett um átta kílómetrum austan við Washington.

Fyrr á þessu ári var þó greint frá því að Commanders hefðu fengið leyfi fyrir því að byggja nýjan völl í Washington. Sá á að vera staðsettur á sama stað og RFK-leikvangurinn var, sem var heimavöllur liðsins frá 1961-1996. Nýi völlurinn á að vera tilbúinn árið 2030 og mun byggingin kosta um 3,7 milljarða Bandaríkjadala, eða rúmlega 450 milljarða íslenskra króna.

Nú gæti hins vegar farið svo að ekkert verði úr áformum liðsins um að byggja nýjan völl. Donald Trump Bandaríkjaforseti er nefnilega ekki hrifin af nafni liðsins.

Liðið hefur nefnilega aðeins heitið Washington Commanders síðan árið 2022. Frá 1937 til 2019 hét liðið Washington Redskins og svo Washington Football Team frá 2020 til 2021.

Nafnið Redskins var hins vegar lagt til hliðar þar sem það þótti niðrandi við frumbyggja Ameríku.

Það er þó í það minnsta einn maður sem virðist sakna Redskins-nafnsins meira en aðrir. Donald Trump greindi frá því á samfélagsmiðli sínum, Truth Social, að hann gæti sett hömlur á liðið þannig að ef að forráðamenn þess taka ekki upp gamla nafnið aftur muni hann ekki leyfa þeim að byggja nýja völlinn í Washington.

„Ég get sett hömlur á þá þannig að ef þeir breyta ekki nafninu sínu aftur í hið upprunalega Washington Redskins, og losa sig við þetta fáránlega viðurnefni, Washington Commanders, þá fá þeir ekki samning um að byggja völl í Washington,“ ritaði Trump á samfélagsmiðil sinn.

„Liðið yrði miklu verðmætara og samningurinn yrði mun meira spennandi fyrir alla,“ bætti Trump við áður en hann nefndi fleiri lið sem ættu að gera slíkt hið sama að hans mati.

„Cleveland ætti að gera það sama með Cleveland Indians,“ ritaði Trump, en í dag heitir liðið Cleveland Guardians. Hann segir einnig að nafnabreytingin hafi gert það að verkum að eigandi liðsins hafi mátt þola ósigur í kosningum.

„Eigandi hafnaboltaliðsins í Cleveland, Matt Dolan, sem er mjög pólitískur, er búinn að tapa þremur kosningum í röð vegna þessarar fáránlegu nafnabreytingar. Það sem hann áttar sig ekki á er að ef hann breytir nafninu aftur í Cleveland Indians þá á hann í alvöru kannski möguleika á því að vinna kosningar.“

„Indjánar hafa mátt þola mjög ósanngjarna meðferð. GERUM INDJÁNA FRÁBÆRA AFTUR!“ ritaði Trump að lokum.