David Beckham lagður inn á sjúkra­hús

Beckham var lengi einn besti knattspyrnumaður Englendinga en er nú einn af eigendum bandaríska fótboltaliðsins Inter Miami.

Það hefur verið nóg að gera hjá Beckham að undanförnu, því hann hélt upp á fimmtugsafmælið sitt í maí og var síðan gerður af Sir David Beckham af Karli Bretakonungi fyrr í þessum mánuði. Liðið hans, Inter Miami, er síðan komið áfram í sextán liða úrslitin á heimsmeistaramóti félagsliða.

Victoria Beckham, eiginkonan hans, birti mynd af David á samfélagsmiðlum þar sem sjá má hann liggja í sjúkrarúminu. „Náðu þér sem fyrst pabbi,“ skrifaði hún undir.

Enskir miðlar hafa grafið það upp að þessi aðgerð sé komin til vegna 22 ára fótboltameiðsla.

Beckham úlnliðsbrotnaði í vináttulandsleik á móti Suður-Afríku árið 2003. Þá voru settar skrúfur í hendi hans og það virðist vera sem ein þeirra hafi orðið eftir.

Skrúfan kom í ljós við skoðun og ákveðið var að fjarlægja hana með aðgerð.

Beckham er brosandi á mynd eiginkonunnar og virðist taka þessu bara með jafnaðargeði.

Beckham lék á sínum tíma 115 landsleiki fyrir Englendinga og varð meðal annars sex sinnum Englandsmeistari með Manchester United.