Trump hellir sér yfir flokks­bróður sinn: „MAGA ætti að losa sig við þennan aumkunar­verða aumingja“

Þann sautjánda júní síðastliðinn lagði Thomas Massie, öldungadeildarþingmaður Repúblikanaflokksins frá Kentucky, fram þingsályktunartillögu í slagtogi við Ro Khanna, fulltrúa Demókrataflokksins frá Kaliforníu, þess efnis að Bandaríkin tækju ekki beinan þátt í átökum Ísraels og Írans.

Thomas Massie gagnrýndi loftárásir Bandaríkjanna á kjarnorkuinnviði í Íran harkalega á samfélagsmiðlum í dag og sagði þær brot á stjórnarskrá Bandaríkjanna.

„Þetta er góð vika fyrir nýíhaldsmenn [hugmyndafræðilegur armur innan Repúblikanaflokksins sem þykir aðhyllast herskáa og afskiptasama utanríkisstefnu] og hergagnaiðnaðinn sem vilja alltaf stríð,“ sagði hann í viðtali við bandaríska miðilinn CBS í dag.

„Léttvigtarþingmaðurinn“ Thomas Massie

Bandaríkjaforseta þótti auðsýnilega ekki mikið koma til þessa ummæla fulltrúans frá Kentucky-ríki.

„Thomas Massie öldungadeildarþingmaður er ekki MAGA-maður, þó svo að hann sé gjarn á að kalla sig það. Raunar vill MAGA-hreyfingin sem minnst af honum vita, þekkir hann ekki og ber enga virðingu fyrir honum. Hann er neikvætt afl sem greiðir alltaf atkvæði „Á MÓTI,“ sama hve gott málið kann að vera. Hann er einfaldur „athyglissjúklingur“ sem álítur það góða pólitík að Íranar búi yfir háþróuðu kjarnavopni á sama tíma og þeir öskra „NIÐUR MEÐ AMERÍKU“ við hvert tækifæri,“ sagði Trump í langri færslu á samfélagsmiðli sínum Truth Social.

Sjá einnig: „Íran, yfirgangsseggur Miðausturlandanna, verður að boða til friðar“

Hann sagði loftárás gærkvöldsins hafa gengið vonum framar. Bandaríkjunum hefði tekist að hrifsa kjarnorkuvopn beinlínis úr greipum Írana sem hefðu fullan hug á að beita því. Íranar hefðu myrt og limlest þúsundir Bandaríkjamanna. Hann kvað „léttvigtarþingmanninn“ Massie vera auman og áhrifalausan.

Latur, athyglissjúkur, afkastalítill, aumkunarverður og svo framvegis

Bandaríkjaforseti lét þó ekki þar við sitja heldur sagði Massie líka sýna Bandaríkjaher vanvirðingu með framferði sínu og ummælum.

„Hann sýnir hinum mikla her okkar vanvirðingu, og öllu því sem hann stendur fyrir, með því að viðurkenna ekki snilligáfu hans og hugrekki í árás gærkvöldsins sem var algjör og fullkominn sigur. Massie ætti að hætta þessu leikriti sínu og læra að setja Bandaríkin í fyrsta sæti, en hann veit ekki hvernig hann á að fara að því. Hann hefur ekki hugmynd,“ skrifaði Trump.

„MAGA-hreyfingin ætti að losa sig við þennan aumkunarverða AUMINGJA, Tom Massie, líkt og um pestina væri að ræða,“ skrifaði hann svo.

Trump hét því þá að finna góðan föðurlandsvin til að mæta Massie í næsta prófkjöri og að hann myndi persónulega leggja sitt af mörkum til að tryggja það að Massie missti sætið sitt í öldungadeild Bandaríkjaþings.

„MAGA snýst ekki um lata, athyglissjúka, afkastalitla stjórnmálamenn sem Thomas Massie er svo sannarlega dæmi um,“ sagði Bandaríkjaforseti.