Allir úr stærsta ár­gangi sögunnar fengu inni

Í tilkynningu þess efnist á vef menntamálaráðuneytisins segir að innritun allra nýnema úr grunnskóla í framhaldsskóla hafi gengið vonum framar og sé nú lokið. Með samstilltu átaki framhaldsskóla og yfirvalda hafi tekist að ljúka innritun fyrr en undanfarin ár. 5.231 nýnemar hafi sótt um innritun í framhaldsskóla í ár eða 554 fleiri en í fyrra.

Nemendur hafi þurft að velja að minnsta kosti tvo skóla í umsókninni en hafi einnig haft kost á að velja þrjá. 4.236 nemendur hafi fengið pláss í þeim skóla sem þeir völdu í fyrsta vali, 669 í öðru vali og 204 í þriðja vali. Þá hafi 122 nemendur fengið úthlutað plássi í skóla sem þeir völdu ekki sérstaklega en sem sé með laus pláss. Það sé minna hlutfall en undanfarin ár en í ár hafi í fyrsta sinn verið gefinn kostur á að velja þrjá skóla í stað tveggja.

Ný innritunargátt á vegum Miðstöðvar menntunar og skólaþjónustu í samstarfi við Stafrænt Ísland hafi verið tekin í notkun. Hún hafi bætt þjónustu við umsækjendur og öryggi í umsóknarferlinu til muna.