Hefur sjálfur séð eyði­leggingu af völdum botn­vörpu­veiða

Formaður Landssambands smábátasjómanna sagði í fréttum Sýnar í gær að sambandið hefði barist gegn botnvörpuveiðum í áratugi. Sambandið auglýsti gegn þeim í DV og Fréttablaðinu árið 2001. LÍÚ forveri SFS kallaði auglýsingarnar þá ómerkilegan áróður í fjölmiðlum.

Gagnrýnin kom í kjölfar myndar Davids Attenboroughs um Hafið. 

Mikilvægt að bæta veiðiaðferðirnar

Þorsteinn Sigurðsson forstjóri Hafrannsóknarstofnunar segir mikilvægt að leita allra leiða til að takmarka umhverfisáhrif botnvörpuveiða sem og annarra veiðiaðferða.

„Það á stöðugt að vera að endurbæta veiðarfæri. Togveiðarfæri eru í grunninn 140-150 ára gömul uppfinning og hafa í sjálfu sér ekki breyst. Útfærslurnar eru mismunandi. Við eigum að leita allra leiða til að lágmarka þá snertingu sem veiðarfærin hafa við botninn,“ segir Þorsteinn.

Þorsteinn telur að núverandi botnvörpuveiðar valdi ekki miklum skaða en hafi gert það áður fyrr.

„Það er ýmislegt sem er verið að gera til þess að koma í veg fyrir að áhrif botnvörpunnar séu ekki til skaða. Það er ekki hægt að neita því að botnvörpuveiðar hér áður fyrr voru til mikils skaða og búið að brjóta niður kaldsjávarskóralla fyrir sunnan og vestan land,“ segir hann.

Hann bendir á að Hafrannsóknarstofnun hafi lokað mörgum svæðum fyrir veiðum og þar eigi lífríkið og sé byrjað að jafna sig. 

„Það er víða verið að vernda grunnslóðina fyrir trollinu,“ segir Þorsteinn.  

BBC fékk tökur fyrir Hafið

Guðmundur Viðarsson sjómaður og veiðarfærahönnuður sem hefur kvikmyndað botnvörpuveiðar við Ísland segir að kvikmyndateymi BBC hafi haft samband við sig til að fá tökur frá honum fyrir heimildarmynd Davids Attenborough um Hafið.

„Ég hef tekið eitthvað af þessum myndum sjálfur með myndavélum á trollum á Íslandi. Við höfum verið að nýta þessa tækni í veiðifærahönnun og meta það sem við sem við erum að gera til sjós. Ég tek þetta oft með þegar ég er á hafinu.“

Miðað við það sem þú hefur séð, hver eru áhrif þessara veiða á lífríkið þar sem veiðarnar eru stundaðar?

„Áhrifin eru kannski ekki beint sjáanleg úr einni myndatöku yfir í eina veiðislóð. En þyngd veiðarfæra hefur gríðarleg áhrif og hönnun veiðarfæra hefur áhrif á botninn ef ekki rétt er farið að.“