Tónlistarhátíðinni Lóu aflýst

Sólrún Dögg Jósefsdóttir skrifar 17. júní 2025 07:17

Hátíðin átti að fara fram á þessu svæði, hinum svokallaða þríhyrningi. Vísir/Anton Brink

Lóu, tónlistar- og matarhátíð sem átti að fara fram í Laugardal um helgina, hefur verið aflýst.

Í fréttatilkynningu segir að hátíðinni sé aflýst vegna óviðráðanlegra aðstæðna. Allir miðar verði endurgreiddir og miðahafar muni fá sérstakan póst varðandi endurgreiðsluferlið. Fleira kemur ekki fram í tilkynningunni og því ekkert sem bendir til þess að hátíðinni verði fundinn nýr tími.

Í tilkynningu á Facebook viðburði hátíðarinnar segir að samið hafi verið við fjölda listamanna sem áttu að koma fram á hátíðinni og þeir muni koma fram á öðrum viðburðum síðar.

„Tónlistar- og matarhátíðin Lóa - The Reykjavík Food & Music festival verður haldin á lengsta degi ársins, þann 21. júní næstkomandi. Hátíðin fer fram í Laugardalnum og er um sannkallaða stórhátíð að ræða þar sem tónlist, matur og götumenning sameinast og stórstjörnur stíga á svið,“ sagði í tilkynningu þegar hátíðin var fyrst auglýst.

Þá var fjöldi innlendra og erlendra tónlistarmanna auglýstur, þar á meðal Jamie XX, Mobb Deep, De La Soul, Joy Anonymous og Mos Def.

Fréttin hefur verið uppfærð.

Tónlist Matur Menning Tónleikar á Íslandi Reykjavík