Skúli og fé­lagar aftur sýknaðir af milljarðakröfum

Í dómi Héraðsdóms Reykjavíkur, sem kveðinn var upp í dag, segir að ellefu þátttakendur í skuldabréfaútboðinu hafi höfðað mál í maí árið 2022 á hendur þeim Skúla, Liv Bergþórsdóttur, Helgu Hlín Hákonardóttur, Davíð Mássyni, og dánarbúi Basils Bens Baldanza. Þau hafi öll verið stjórnarmenn í Wow air og Skúli þar að auki forstjóri og eini eigandi félagsins. Þá hafi fimm erlendum tryggingarfélögum verið stefnt til réttargæslu.

Þeim hefur áður verið stefnt til greiðslu hárra fjárhæða en verið sýknuð.

Stefnendur séu fjárfestar sem tóku þátt í skuldabréfaútboði WOWair hf., sem efnt hafi verið til af hálfu félagsins í ágúst 2018 og lokið 21. september sama ár. Þeir hafi krafist alls 18,3 milljóna evra, eða um það bil 2,6 milljarða króna.

Töldu sig hafa fengið rangar upplýsingar

Í dóminum segir að stefnendur hafi byggt málatilbúnað sinn um saknæma og ólögmæta háttsemi stefndu einkum á þríþættum grunni, í fyrsta lagi að stefndu hafi borið ábyrgð á því að stefnendum hafi verið veittar rangar og misvísandi upplýsingar um WOWair hf. í aðdraganda skuldabréfaútboðsins, þar með talið í fjárfestakynningu, og til þess vísað að upplýsingar um vanskil hafi ekki verið réttilega tilgreindar í kynningunni. 

Síðan hafi verið byggt á því að stefndu beri ábyrgð á því að brotið hafi verið gegn skilmálum útboðsins og lagt ranglega til grundvallar að lágmarksþátttaka hafi náðst þegar raunin hafi verið önnur þar sem þrír bjóðendur hafi skilyrt tilboð sín þannig að í raun hafi kaup þeirra á skuldabréfum ekki gagnast WOWair hf. á neinn hátt. 

Þá hafi upplýsingar um eigið fé félagsins verið settar fram með villandi eða röngum hætti og í þeim efnum byggt á því að um hafi verið að ræða verulegt ofmat á virði félagsins Cargo Express ehf. sem WOWair hf. hafi keypt 60 prósenta hlut í af Títan Fjárfestingafélagi ehf, móðurfélagi Wow air. 

Loks hafi stefnendur vísað til þess að WOWair hf. hafi í miklum mæli látið skuldir safnast upp við móðurfélag sitt og slíkum skammtímaskuldum verið umbreytt í hlutafé án þess að raunverulegar kröfur hafi legið þar að baki, í því skyni að styrkja bókfært eigið fé félagsins. Í þeim efnum hafi verið vísað til viðskipta með fjórar flugvélar, TF-DAD, TF-MOM, TF-SON og TF-KID. Fyrir liggi jafnframt að tilskildu eigin fé eftir útboðið hefði ekki verið náð og fjármunir hefðu ekki verið til reiðu á bankareikningum félagsins á fyrsta gjalddaga vaxta í desember 2018, þrátt fyrir ákvæði skuldabréfaútgáfunnar þar að lútandi. 

Stefnendur hafi byggt á því með vísan til framangreinds að þeir hefðu ekki tekið þátt í útboðinu ef þeir hefðu fengið réttar og fullnægjandi upplýsingar um WOWair hf. og stöðu þess og hefðu því ekki orðið fyrir tjóni sem nam fjárfestingu þeirra.

Máttu trúa því að félagið myndi lifa

Í niðurstöðukafla dómsins segir að á grundvelli samantektar á framgöngu stjórnar hafi því verið slegið föstu að stefndu sem stjórnarmenn hafi mátt líta svo á að líkur væri á að aðkoma fjárfesta, meðal annars Icelandair, væri raunhæf í aðdraganda gjaldþrots Wow og fjármunir þeir sem fyrirhugað væri að veita til rekstursins hefðu nægt til að forða félaginu frá yfirvofandi gjaldþroti. Þetta hafi þegar komið fram í fyrri dómum tengdum falli Wow air, sem hafi fullt sönnunargildi í málinu.

Með vísan til þessara dóma og frekari umfjöllunar í dóminum hafi því verið hafnað að rök hafi staðið til að gefa WOWair hf. upp til gjaldþrotaskipta fyrr en það var gert.

Samkvæmt öllu því sem rakið var í dóminum og lýtur bæði að þeim atvikum sem stefnendur vísuðu til og aðgæsluskyldu fjárfestanna sem sérfróðra aðila á skuldabréfamarkaði, hafi því verið hafnað að orsakasamband sé á milli háttsemi stjórnarmannanna og tjóns fjárfestanna þannig að það geti varðað stefndu skaðabótaskyldu, hvorki af gáleysi né ásetningi. Þau væru því sýknuð af öllum kröfum stefnenda.

Stefnendur voru dæmdur til að greiða Skúla og félögum alls 28 milljónir króna í málskostnað.