Thomas Frank að taka við Tottenham

Frank er sagður falur fyrir tíu milljónir punda, kaupverð þjálfarans samkvæmt klásúlu í samningnum við Brentford og Tottenham er talið tilbúið að greiða þá upphæð. Félagaskiptasérfræðingurinn Fabrizio Romano greinir svo frá því að viðræður þjálfarans og félagsins séu „á lokastigi.“

Thomas Frank tók við Brentford haustið 2018 þegar liðið sat um miðja næstefstu deild. Undir hans stjórn fór liðið tvisvar í úrslitaleik upp á sæti í ensku úrvalsdeildinni og vann í seinna skiptið árið 2021.

Síðan þá hefur liðið verið laust við fallbaráttu og þrátt fyrir að selja stórstjörnuna Ivan Toney náði liðið sínum besta árangri á nýliðnu tímabili, endaði í tíunda sæti og var lengi vel að daðra við Evrópubaráttu.

Undir stjórn Frank hefur Brentford gert mörg góð kaup, hann er maðurinn sem fékk meðal annars Ivan Toney, Bryan Mbuemo, Frank Onyeka, Yoane Wissa og Mikkel Damsgaard til félagsins. Að ógleymdum landsliðsmarkmanni Íslands, Hákoni Rafni Valdimarssyni. 

Dapur árangur en leikmenn öskuillir

Tottenham er í þjálfaraleit eftir að hafa rekið Ange Postecoglou, fáeinum dögum eftir að hann stýrði liðinu að fyrsta titlinum í sautján ár. Í yfirlýsingu Tottenham segir að ákvörðunin sé tekin með hag félagsins að leiðarljósi. Ekki sé hægt að líta fram hjá döprum árangri í ensku úrvalsdeildinni á nýafstöðnu tímabili.

Leikmenn liðsins eru sagðir margir mjög ósáttir, öskuillir jafnvel og í uppreisnarhug.

„Leikmennirnir eru mjög reiðir yfir því sem hefur gerst og hvernig félagið hagaði sínum málum. Það verður mjög erfitt fyrir næsta knattspyrnustjóra,“ sagði heimildarmaður við Telegraph.