Viktor Gísli pólskur meistari í kvöld

Wisla Plock vann báða leikina í úrslitaeinvíginu á móti Kielce en litlu munaði þó í þeim báðum.

Liðið tryggði sér titilinn með því að vinna í vítakeppni í kvöld.

Kielce var þremur mörkum yfir í hálfleik, 10-7. Wisla vann upp muninn og var komið yfir undir lokin en Kielce menn náðu að jafna í 22-22 og tryggja sér vitakeppni.

Leikmenn Wisla nýttu vítin betur og tryggðu sér titilinn með 3-2 sigri í vítakeppninni.

Wisla hafði unnið fyrsta leikinn með einu marki á heimavelli sínum, 30-29, en leikurinn í kvöld var á heimavelli Kielce.

Mirko Alilović byrjaði í marki Wisla í kvöld og varði sjö skot í fyrri hálfleiknum (41%). Hann gaf eftir í þeim síðari og varði alls níu skot.

Viktor kom inn í markið undir lok seinni hálfleiks en náði ekki að verja neitt af þeim fjórum skotum sem hann reyndi við í venjulegum leiktíma.

Alilović stóð síðan í markinu í vítakeppninni en hann hafði varið tvö víti í leiknum sjálfum.