Fjórir miðverðir í ís­lensku vörninni á Lerkendal

Leikurinn fer fram á Lerkendal Stadion í Þrándheimi og hefst hann kl. 18:00 að íslenskum tíma.

Ísland er í þriðja sæti riðilsins með þrjú stig eftir fjóra leiki á meðan Noregur er í öðru sæti með fjögur stig eftir fjóra leiki.

Fyrri leikur liðanna endaði með markalausu jafntefli á Þróttarvelli í apríl.

Þorsteinn gerir fjórar breytingar frá byrjunarliði sínu í síðasta leik liðsins í apríl og mestu munar um að fyrirliðinn Glódís Perla Viggósdóttir kemur aftur inn eftir meiðsli. Ísland gerði 3-3 jafntefli við Sviss í síðasta leik sínum.

Auk Glódísar koma einnig inn í liðið þær Natasha Moraa Anasi, Hildur Antonsdóttir og Sandra María Jessen.

Berglind Rós Ágústsdóttir, Emilía Kiær Ásgeirsdóttir, Sædís Rún Heiðarsdóttir og Guðný Árnadóttir fara allar úr byrjunarliðinu.

Glódís er ein af fjórum miðvörðum í varnarlínu íslenska liðsins en hinar eru Guðrún Arnardóttir, Ingibjörg Sigurðardóttir og Natasha Moraa Anasi. Guðrún og Natasha taka að sér bakvarðarstöðurnar.

Karólína Lea Vilhjálmsdóttir, sem skoraði þrennu í síðasta leik, er á miðjunni ásamt Alexöndru Jóhannsdóttur og Hildi Antonsdóttur.

Frammi eru síðan þær Sveindís Jane Jónsdóttir, Hlín Eiríksdóttir og Sandra María Jessen.