Fasteignamat hækkar um 9,2 prósent á milli ára

Atli Ísleifsson skrifar 28. maí 2025 10:00

Fasteignamat fyrir árið 2026 hefur nú verið kynnt. Vísir/Vilhelm

Fasteignamat 2026 er að meðaltali 9,2 prósent hærra en núgildandi fasteignamat fyrir hverja fasteign. Hækkanirnar eru mestar á Suðurnesjum og Norðurlandi.

Þetta kemur fram í tilkynningu frá Húsnæðis- og mannvirkjastofnun en stofnunin reiknar það árlega og birtir í lok maímánaðar.

Fram kemur að Fasteignamat 2026 sé að meðaltali 9,2 prósentum hærra en núgildandi fasteignamat fyrir hverja fasteign. Þá nemi meðalhækkun fasteignamats íbúða 10,2 prósentum, á meðan fasteignamat sumarhúsa hækki um 11,5 prósent og fasteignamat atvinnueigna hækki um 4,8 prósent.

Tilgangur fasteignamats

Fasteignamat er notað til útreikninga á fasteignagjöldum sem sveitarfélög ákvarða, erfðafjárskatti og stimpilgjaldi á þinglýsingu kaupsamninga. Einnig nota sumar lánastofnanir hlutfall af fasteignamati til að ákvarða lánsupphæð.

„Mikil eftirspurn var á íbúðamarkaði í nágrannasveitarfélögum Grindavíkur á síðasta ári og hefur fasteignamat á Suðurnesjum því hækkað umfram landsmeðaltal. Líkt og í fyrra hefur HMS hins vegar ákveðið að halda fasteignamati í Grindavíkurbæ óbreyttu á milli ára, þar sem óvissuástand ríkir og engin markaðsvirkni hefur átt sér stað í sveitarfélaginu.

Fasteignamat hækkar líka umfram landsmeðaltal á Norðurlandi, en þar hefur virði atvinnu- og sumarhúsaeigna hækkað töluvert,“ segir í tilkynningunni.

Hægt er að fletta upp fasteignamati einstakra fasteigna með því að smella á hnappinn hér að neðan, en tölfræði að baki fasteignamatinu má finna í gögnum og mælaborðum fasteignaskrár hjá HMS.

Leitarvél fyrir fasteignamat einstakra fasteigna: https://hms.is/fasteignaskra

Sama aðferðarfræði og fyrri ár

Aðferðarfræðin sem notast er við útreikning fasteignamats er sambærileg þeirri sem notuð hefur verið síðustu ár eða frá því að HMS tók við málaflokknum árið 2022 og byggir beint eða óbeint á kaupverði sambærilegra fasteigna.

„Matsaðferðir eru mismunandi eftir tegundum fasteignanna, en flestar fasteignir flokkast sem íbúðareignir, sumarhús eða atvinnueignir. Fyrir íbúðareignir og sumarhús er nær einungis horft til kaupsamninga, en hjá atvinnueignum eru leigusamningar einnig hafðir til hliðsjónar þegar markaðsvirði þeirra er metið.

Á næstu 12 mánuðum hyggst HMS leggja sérstaka áherslu á endurskoðun á aðferðum við gerð fasteignamats atvinnueigna með það að markmiði að útreikningurinn sé gangsærri og að fasteignamatið endurspegli betur markaðsvirði. Matsaðferð atvinnueigna var síðast endurskoðuð árið 2014,“ segir í tilkynningunni.

Hægt er að fylgjast með kynningu HMS á Fasteignamati 2026 í spilaranum að neðan, en útsending hófst klukkan 10.