„Enn sem er komið er staðan ó­breytt og orð Sönnu ó­sönn“

Sanna Magdalena Mörtudóttir, formaður velferðarráðs og borgarfulltrúi, sagði í viðtali við kvöldfréttir Stöðvar 2 í vikunni að mál Sigurbjargar væri á borði velferðarsviðs. Rannveig Einarsdóttir, sviðsstjóri velferðarsviðs Reykjavíkurborgar, segir í samtali við fréttastofu að fólki sé veittur stuðningur í svona málum.

„Við veitum stuðning í málum sem þessum. Fólk sem er í þessari stöðu, við erum með fagfólk sem aðstoðar, það er ekkert öðruvísi í þessu máli,“ segir Rannveig.

Sigurbjörg sjálf kannast þó ekki við að það sé þannig. Hún hafi verið að bíða síðustu daga eftir símtali frá félagsráðgjafa eða VOR-teymi en hafi ekkert heyrt um hvað sé hægt að gera fyrir hana.

„Enn sem er komið er er staðan óbreytt og orð Sönnu ósönn,“ segir Sigurbjörg sem horfði á viðtalið við Sönnu úti í rigningu í köldum og nánast batteríslausum iPad.

„Þetta leit ekki vel út. En þá hringdi vinkona mín og tók á leigu hótelherbergi fyrir mig. Ég hef það þangað til á morgun. Ég ætlaði að koma mér út til að selja álfinn en hef ekki haft orku í það. Ég viðurkenni að ég er enn lítil í mér og meyr,“ segir Sigurbjörg leið.

Úrvinda og fyrir vonbrigðum

Hún segist á sama tíma verulega ósátt við viðbrögð borgarinnar og þá sérstaklega fullyrðingar Sönnu um að það sé verið að vinna að lausn.

„Ég varð svo sannarlega fyrir vonbrigðum, ég átti ekki von á þessu, ég bar væntingar til hennar. Ég ligg bara á bæn núna og er alveg úrvinda eftir þetta allt. En það er kominn föstudagur og það er ekkert að fara að gerast. Ég get ekki séð það.“

Sjá einnig: Konan „terrorí­seri“ alla í hryllings­húsinu

Sigurbjörg gagnrýnir líka að ekkert hafi verið gert til að takast á við konuna sem enn hrellir allan stigaganginn í blokkinni sem hún var borin út úr. Eins og kom fram fyrr í vikunni greiddi Sigurbjörg ekki leigu vegna ofsókna konunnar og viðbragðsleysis Félagsbústaða. 

Hún segir konuna enn hóta sér. Hún hafi farið að sækja kettina sína daginn eftir að hún var borin út og þá fengið morðhótanir frá konunni.

„Ég hélt að hún myndi ráðast á mig. Ef ég dey þá þarf bara að horfa á eina manneskju. Hún er stórhættuleg.“

Sigurbjörg segir íbúa hafa kvartað reglulega yfir konunni og það sé ekki rétt sem Sigrún Árnadóttir, framkvæmdastjóri Félagsbústaða, hafi sagt fyrr í vikunni að það sé alltaf tekist á við kvartanir.