Tóku Vals­menn til bæna: „Það er kannski hel­vítis málið, það er ekki hungur í para­dís“

Pressan er orðin mikil á þjálfara Vals­manna Sr­djan Tufegdzic eftir slappa byrjun á tíma­bilinu sem náði nýrri lægð á móti FH um síðustu helgi, liði sem hafði ekki unnið leik í deildinni fyrir þann leik en sér­fræðingar Stúkunnar setja spurningar­merki við leik­menn Vals og það hvernig þeir báru sig í leiknum gegn FH.

„Hvað getur hann (Túfa) gert?“ sagði Ólafur Kristjáns­son, einn af sér­fræðingum Stúkunnar um stöðuna hjá Val. „Ég veit að Túfa vinnur starf sitt af miklum heilindum og er góður þjálfari, Hann verður, því ég veit að það er mikill hiti á honum, að koma mönnum í skilning um að þetta sé bara ekki ásættan­legt. Að koma í Kapla­krika í þessum mögu­leika og tapa leiknum á þennan hátt.“

Vals­menn hafa spilað sau­tján leiki undir stjórn Túfa í Bestu deildinni og aðeins náð í fimm sigra. Þá hefur liðið gert sjö jafn­tefli og tapað fimm leikjum. Merki­lega við þessa leiki er sú stað­reynd að í þeim hefur Valur aldrei haldið marki sínu hreinu.

„Getur ekki verið í fótbolta og lifað fyrir lækin“

Óli Kristjáns er á því að úr­slitin séu einn þáttur en bragurinn á liðinu sé annar.

„Það er sam­eigin­leg ábyrgð leik­manna og þjálfara að bragurinn verði betri en hann er. Þú getur ekki bara verið í fót­bolta og lifað fyrir lækin. Þá er ég ekki að tala um læk sem rennur heldur það að fá læk fyrir það sem þú gerir. Það eru líka helvíti erfiðir tímar þegar að bjátar á móti. Þá verða menn að stíga upp og standa saman og vinna al­menni­lega fyrir félagana og félagið. Það finnst mér bara ekki vera hægt að sjá. Ef ég væri stuðnings­maður Vals, sem ég er ekki, þá fyndist mér þetta engan veginn ásættan­legt.“

Albert Brynjar Inga­son, einnig sér­fræðingur Stúkunnar, segir þetta gamla sögu og nýja með Val.

„Á hverju einasta tíma­bili, sér­stak­lega þegar að titillinn er farinn, þá hætta þeir alveg… Og meira segja þegar reynir á þá í leik þá hætta þeir líka. Þeir nenna ekki að leggja þetta á sig þegar að titillinn er farinn og nenna ekki að leggja nógu mikið á sig til að sækja titilinn.“

„Menn þarna sem eru ekki með hugann við þetta“

Það stingi í stúf þegar um er að ræða lið með eina bestu um­gjörð á landinu, lið sem hefur haft stór nöfn á borð við Aron Jó, Hólmar Örn Eyjólfs­son, Gylfa Þór Sigurðs­son, besta fram­herja deildarinnar í Pat­rick Peder­sen og besta kant­mann deildarinnar síðustu tvö tíma­bil í Jónatan Inga innan sinna raða undan­farin ár.

„Það er kannski helvítis málið. Það er ekki hungur í para­dís,“ svaraði Óli Kristjáns. „Ég sé ekki hvað menn vilja. Það er talað um að Valur sé félag sem eigi að vera berjast um titla. Þá þarf að vera meira merking á bak við þau orð.“

En er lausnin að skipta um þjálfara? Eitt­hvað sem hefur verið reynt marg­oft en virðist ekki ganga eitt og sér.

„Hvort það sé Túfa eða ein­hver annar sem finnur út úr því hverjir það eru sem séu til­búnir í að taka þátt í þessu verk­efni sem fram­undan er og losar sig við þessi skemmdu epli,“ sagði Albert Brynjar. „Því það eru enn þá menn þarna sem eru ekki með hugann við þetta. Það þarf að fara hreinsa til í þessum hóp.“

Ítar­lega um­ræðu um stöðuna hjá liði Vals í Stúkunni frá því í gær má sjá hér ofar í fréttinni.