Ey­gló ætlar að vinna Ólympíugull: „Ég hlýði bara Vé­steini“

Stóðst pressu og væntingar

Eygló varð Evrópumeistari í ólympískum lyftingum síðastliðinn fimmtudag, fyrst allra Íslendinga. Hún var efst á styrkleikalista keppenda fyrir mótið, sigurstranglegust, og stóð vel undir væntingum.

„Það var svolítið skrítið að fara inn í þetta með hæstu samanlögðu lyfturnar og með þessa pressu á að vinna, verða í fyrsta sæti, því ég vissi að það yrði erfitt. Það er ekkert gefið í þessu og þetta er ótrúlega sterkur flokkur sem ég er að keppa í og margt sem getur gerst.

Maður hefði getað hitt á erfiðan dag eða eitthvað ekki gengið upp. Þetta var alls ekki gefið og mér fannst mjög óþægilegt að vera eitthvað að segja það upphátt að ég ætlaði að vinna en ég er mjög glöð núna eftir á að ég hafi náð því. Nú get ég sagt, mjög stolt, að ég hafi náð því“ sagði Eygló í viðtali sem var sýnt í Sportpakkanum á Stöð 2 í gærkvöldi. Innslagið má sjá hér fyrir neðan. Heildarviðtalið er neðst í fréttinni. 

„Ótrúlega dýrmætt“

Eygló fékk gullmedalíuna síðan afhenta frá Hörpu Þorláksdóttur, sem er bæði formaður lyftingasambandsins og móðir hennar.

„Það var náttúrulega bara frábært sko. Það er svo gaman að fá að upplifa þetta með henni og ótrúlega gaman að alþjóðalyftingasambandið hafi leyft henni að taka þátt í þessu augnabliki með mér. Það var ótrúlega dýrmætt og ég er mjög þakklát fyrir það.“

„Svo voru bara allir heima, pabbi og bræður mínir, amma og afi, öll fjölskyldan heima að horfa saman. Þau komu ekki með í þetta sinn en vonandi koma þau einhvern tímann.“

Ólympíugull í Los Angeles 2028?

Ljóst er að Eygló er komin í allra fremsta flokk í sinni íþrótt og mikils er ætlast af henni á næstunni. Vésteinn Hafsteinsson, afrekstjóri ÍSÍ, sagði til dæmis í samtali við ríkisútvarpið að Eygló gæti farið alla leið. Hún yrði fyrst Íslendinga til að vinna gullverðlaun á Ólympíuleikunum.

„Ég hlýði bara Vésteini sko. Ef hann segir það þá bara geri ég það. Við sjáum til hvað gerist á Ólympíuleikunum næst. Ég ætla allavega að æfa eins og brjálæðingur og gera mitt allra besta.“

Meðan Eygló æfir eins og brjálæðingur sinnir hún einnig læknisfræðinámi, þannig að dagarnir eru nokkuð annasamir.

„Það gengur mjög vel. Hingað til allavega. Núna eru bara lokaprófin að byrja, fyrsta lokaprófið á föstudaginn. Þannig að ég þarf svolítið bara að fara heim núna að læra“ sagði Eygló brosmild í bragði.

Heildarviðtalið við Eygló má finna hér fyrir neðan þar sem farið er yfir fleira en í fréttinni að ofan. Meðal annars breytingar á þyngdarflokkunum og heimsmeistaramótið sem hún fer á í haust.