Kallaði sig hálf­vita eftir á­reksturinn

Max Verstappen náði með ótrúlegum hring í gær að tryggja sér ráspólinn en hann varð 0,01 sekúndu á undan Oscar Piastri. Þeir tveir eru næstir á eftir Norris í heildarstigakeppninni en Norris er með 77 stig, Piastri 74 og Verstappen 69.

Ljóst er að Norris gæti því misst toppsætið í dag en hann byrjar aðeins í 10. sæti eftir stórt klúður í tímatökum aðra keppnina í röð.

„Það er eins og ég hafi aldrei keyrt Formúlu 1 bíl,“ sagði Norris eftir að hann varð í 6. sæti í tímatökunum í Barein. Eftir að hann klessti á í gær kallaði hann svo sjálfan sig „fokking hálfvita“ eins og heyra mátti í talstöðvarsamtali rétt eftir að hann staðfesti að það væri í lagi með sig.

Norris var spurður út í þessi orð sín eftir tímatökurnar og hafði ekki skipt um skoðun.

„Þetta passar alveg. Ég er sammála þessu. Ég ætti að vera að berjast um ráspólinn og ég ætti ekki að vera að taka svona áhættur eins og ég virðist gera,“ sagði Norris.

„Það er ekki víst að ég hefði komist á ráspól því Max gerði virkilega vel. Þeir voru fljótir og það kom ekki á óvart, svo það hefði verið gaman að taka þátt í slagnum. Mér gekk vel og leið þægilega en ég verð hvorki stoltur né ánægður eftir þetta. Ég hef brugðist mér sjálfum og liðinu, og strákarnir eiga mikið verk fyrir höndum við að laga allt saman,“ sagði Norris og bætti við:

„Ég veit ekki hvað gerðist. Ég hef ekki haft tíma til að skoða það en þetta voru bara mistök. Mér leið vel og var ánægður, svo bílinn var sterkur. Ég er augljóslega búinn að gera mér sjálfum og öllum mjög erfitt fyrir núna en svona er lífið.“

Hér að neðan má sjá röðun manna fyrir ræsinguna í dag en bein útsending frá keppninni hefst klukkan 16:30 á Vodafone Sport.