Max svaraði Marko fullum hálsi

Á dögunum ræddi Helmut Marko framtíð Hollendingsins hjá Red Bull. Téður Marko telur að fjórfaldi heimsmeistarinn gæti yfirgefið Red Bull takist þeim ekki að finna lausnir á annars slöku gengi sínu.

Samningur Verstappen við Red Bull gildir til ársins 2028 en það er talið svo gott sem öruggt að klásúla í samningi ökumannsins geri honum kleift að yfirgefa félagið takist því ekki að uppfylla ákveðin skilyrði.

„Í hreinskilni sagt þá veit ég það ekki. Ég held bara áfram að vinna vinnuna mína og reyna að bæta bílinn,“ sagði Verstappen aðspurður hvað lægi að baki ummælum Marko.

„Barein var ekki góð helgi fyrir okkur. Ég held að við séum öll frekar ósátt með helgina. Við þurfum að lagfæra bílinn og koma með nýjar hugmundir sem gætu hjálpað okkur að bæta hann. Það er það sem ég er aðallega að pæla í, að reyna koma okkur í betri stöðu.“

„Einbeitið ykkur að því að lýsa og ég einbeiti mér að því að keyra. Þá þurfum við ekki að hugsa um aðrar sviðsmyndir,“ sagði Verstappen og glotti er hann var spurður hvort hann væri að íhuga að yfirgefa Red Bull.

F1 keppni helgarinnar fer fram í Sádi-Arabíu. Kappaksturinn verður sýndur beint á Vodafone Sport. Útsending hefst klukkan 16.30 á sunnudag.