Taylor sögð hóta Kanye lög­sókn

Erjur Swift og West ná langt aftur í tímann en lítið hefur farið fyrir þeim undanfarin ár. Nú virðist þó sem þær séu hafnar á ný og hafi harðnað til muna.

Fyrr í vikunni skrifaði West færslu á X þar sem hann greindi frá þremur ástæðum fyrir því af hverju hann fékk aldrei að skemmta í hálfleikshléi Ofurskálarinnar. Það hefði verið eftir að hann sagði George Bush Bandaríkjaforseta vera sama um svart fólk, eftir að hann lenti í deilum við Swift og eftir að hann klæddist MAGA-hatti.

Færslan vakti töluverð viðbrögð en West gekk enn lengra á fimtudag þegar hann birti færslur um það að hann vildi sofa hjá Swift og talaði með niðrandi hætti um sambönd hennar við Justin Bieber og Harry Styles. Færslunum var eytt skömmu síðar.

Rapparinn gengið of langt í þetta skiptið

Guli miðillinn Daily Mail segist hafa heimildir fyrir því að lögfræðiteymi Taylor Swift hafi hótað rapparanum lögsókn með svokallaðri „cease and desist“-kröfu. 

„Í þetta skiptið hefur hann gengið of langt,“ hefur Daily Mail eftir heimildamanni sínum. „Fullyrðingar hans eru ekki bara rangar heldur ærumeiðandi. Þetta er ekki bara slúður. Þetta er kynferðisleg áreitni í garð konu þar sem hún er ófrægð og reynt er að skaða hana og feril hennar.“

Heimildamaður miðilsins segir Swift hafa fengið sig fullsadda af áreitni rapparans og því væri lögsókn eini möguleikinn. Swift hefði í gegnum tíðina forðast slíkar aðgerðir þrátt fyrir fjölda persónulegra árása í hennar en nýjustu fullyrðingar West væru síðasta hálmstráið.

West hefur ekki brugðist opinberlega við hótun Swift um lögsókn en hann hefur í það minnsta eytt færslunum hvort sem það var af eigin ráði eða vegna utanaðkomandi þrýsings.

Saga Swift og West

Upphaf deilnanna milli West og Swift má rekja til VMA-verðlaunanna árið 2009 þegar West ruddist upp á svið í miðri sigurræðu Swift og sagði að Beyonce hefði átt að vinna þau.

Rúmu ári síðar baðst rapparinn afsökunar og sagði Swift ekki hafa átt framkomuna skilið. Fimm árum seinna sást til þeirra knúsast á Grammy-verðlaunahátíðinni og í ágúst sama ár veitti Taylor Kanye heiðursverðlaun á VMA-verðlaunahátíðinni, sömu hátíð og hann truflaði sex árum fyrr.

Kanye var þó fljótur að skemma samband þeirr aftur þegar hann gaf út plötuna Life of Pablo í febrúar 2016. Á laginu „Famous“ söng Kanye eftirfarandi línu: „Ég held að ég og Taylor gætum ennþá stundað samfarir, ég gerði þessa tík fræga.“ Teymið Swift birti í kjölfarið yfirlýsingu um að hún hefði ekki samþykkt textann né verið látin vita af honum.

Kim Kardashian, þáverandi eiginkona West, hélt því fram í júní sama ár að Swift hefði víst verið meðvituð um textann og upptaka sannaði það. Kim birti síðan upptökuna á Snapchat seinna um sumarið. Swift sagði í kjölfarið að hún hefði ekki vitað af því að Kanye myndi kalla hana „tík“ í laginu og að hún hefði ekki áhuga á að taka þátt í sirkus þeirra.