„Ekki séns að fara í sumar­frí“

Emma skoraði 18 stig og var með 6 fráköst en þrátt fyrir að vera einungis 16 ára gömul spilar hún stórt hlutverk í sterku liði Þórs.

„Mér líður frábærlega. Það var náttúrulega bara ekki séns að fara í sumarfrí, sérstaklega láta þær senda okkur hér á okkar heimavelli fyrir framan okkar fólk, það bara kom ekki til greina.“

Hvernig hefur spilamennskan breyst frá hinum leikjunum í einvíginu?

„Ég held við höfum verið miklu grimmari og vorum duglegri að stíga út, fengum ekki jafn mörg sóknarfráköst á okkur eins og í hinum leikjunum og mættum allar tilbúnar og allar sem komu inn gáfu eitthvað frá sér, voru tilbúnar til að gera eitthvað til að vinna þennan leik.“

Eins og fyrr segir átti Emma góðan leik en var hógvær og var strax farin að hugsa um næsta leik.

„Bara ágætlega, bara ekkert að vera festa sig á þessum leik, það er bara næsti leikur , ekki vera neitt ósátt með sig heldur bara upp og áfram.“

Esther Fokke var ekki með í fyrstu tveimur leikjum einvígisins en var leikfær í dag og tók mikinn þátt í leiknum. Emma segir breyta miklu að geta notið hennar aðstoðar á vellinum.

„Það er náttúrulega bara rosa mikilvægt, hún er hörku leikmaður og búið að vera mjög erfitt að hafa hana ekki með í búning og þess vegna er bara geðveikt að sjá hana núna aftur inni á vellinum.“

Hvað þarf Þórsliðið að gera til að sigra næsta leik á Hlíðarenda og koma einvíginu í úrslitaleik í Höllinni eftir viku?

„Það eiginlega bara það sama og í þessum leik; mæta grimmar, mæta tilbúnar, vera bara klárar í að taka þær í fráköstum og fleiru“, sagði Emma Karolína að lokum sem er svo sannarlega ákveðin í að koma einvíginu í oddaleik.