Red Bull búið að gefast upp á Lawson

Samkvæmt heimildum BBC hafa forráðamenn Red Bull ákveðið að skipta Liam Lawson út fyrir Yuki Tsunoda fyrir næstu keppni sem er í Japan um þarnæstu helgi. Hinn ökumaður Red Bull er heimsmeistarinn Max Verstappen.

Lawson lauk ekki keppni í fyrsta kappakstri tímabilsins, í Ástralíu, en endaði í 12. sæti í Kína um síðustu helgi.

Lawson og Tsunoda munu hafa sætaskipti. Lawson fer til systurliðsins Racing Bulls á meðan Tsunoda keppir fyrir Red Bull. Næsta keppni verður í hans heimalandi, Japan.

Nýsjálendingurinn Lawson var fenginn til að keppa við hlið Verstappens eftir að Red Bull lét Mexíkóann Sergio Pérez fara, þrátt fyrir að hann ætti tvö ár eftir af samningi sínum við liðið.

Tsunoda endaði í 12. sæti í Ástralíukappakstrinum og því sextánda í kínverska kappakstrinum um síðustu helgi. Besti árangur hans er 4. sæti í kappakstrinum í Abú Dabí 2021. Á síðasta tímabili fékk hann þrjátíu stig og endaði í 12. sæti í keppni ökuþóra.