Lóa Pind Aldísardóttir hitti þau Hildu, Kristján, börnin þeirra fjögur og þeirra fjölmörgu vini, ættingja á bæði Miami Beach og í Reykjavík, þar sem þau dvelja alltaf hluta á ári í fjórða þætti í sjöttu seríu af „Hvar er best að búa?“
Þau Kristján og Hilda hafa dvalið í nokkur ár á Miami og eru ekki á leiðinni heim. Þau langar ekki í slabbið, enda ansi góðu vön á Miami Beach þar sem meðalhitinn fer lægst niður í rúmlega tuttugu stiga hita.
Leist ekki á blikuna til að byrja með
Í þættinum kemur meðal annars fram að Hildu hafi ekki leist á blikuna á Miami til að byrja með. Hún var lengi að eignast vini og einmana framan af. Það hefur hinsvegar breyst og nú er félagslíf þeirra Kristjáns eins blómlegt og það getur orðið hjá stórri barnafjölskyldu.
Þau eru nú í miðjum klíðum að opna rommverksmiðjuna Little River Distillery og „speak easy“ bar - í anda leynilegra öldurhúsa á bannárunum, í Miami. En auk þess framleiðir Hilda föt undir merkjum Norom og þau framleiða líka Helix vodka, Ask gin og Lagoon bay aperatíf undir merkjum Wanderlust spirits.
Og þau segja Miami algjöra paradís fyrir börnin, með sundlaug í garðinum, ströndina skammt frá, geta gengið í góðan einkaskóla, stundað alls konar íþróttir og læra á hljóðfæri. Þó segja þau ekki endilega mun á tækifærunum sem börnin þeirra hafa miðað við þau tækifæri sem þau sjálf höfðu í sínum uppvexti á Íslandi.
„Það er fullt af tækifærum á Íslandi líka. Alls konar skemmtilegt sem er að gerast þar. Tækifæri eru bara hvernig drifkraft þú hefur til að grípa þau. Og ég held að Íslendingurinn hafi líka drifkraft, allir með sidekick og sjö vinnur, allir að gera flotta hluti þarna. En þú veist, þetta er stór heimur. Ísland er lítið,“ segir Kristján.
Í þáttaröðinni heimsækir Lóa fólk sem rekur kaffihús, rommverksmiðju, kennir Pilates, vinnur hjá OECD, er í verktakabransanum, rekur heimili fyrir táningsmæður í Kenía, selur fasteignir, leysir tölvuvandamál, vinnur við smíðar, sinnir lýsingarhönnun, hannar föt og býr í stórborgum, sveit og bæjum á Tenerife, Borgundarhólmi, Miami Beach, í Mexíkó, París, Brussel, Kenía og Lettlandi.
Framleiðandi og leikstjóri þáttanna er Lóa Pind Aldísardóttir, myndatökumaður fjórða þáttar Ívar Kristján Ívarsson, klippingu annaðist Kári Jóhannsson hjá Obbosí. Framleitt af Lóu Production fyrir Stöð 2.
