Quang Le sagður hafa tekið kaup­til­boði í Herkastalann

Frá þessu greinir Morgunblaðið og segir húsnæðið metið á rúmar 575 milljónir króna.

Þá er haft eftir Guðmundi Hallgrímssyni, fasteignasala hjá Lind, að fyrirvarar séu á kauptilboðinu.

Quang Le komst í fréttirnar eftir umfangsmiklar aðgerðir lögreglu gegn fyrirtækjum í hans eigu en hann er meðal annars grunaður um að hafa stundað mansal. Þá vakti mikla athygli þegar hann tók sér nafnið Davíð Viðarsson, eftir manni sem hefur verið skráður faðir barna Quang Le í hálfan annan áratug.

Sex félög í eigu Quang Le hafa verið úrskurðuð gjaldþrota en tvö ekki; NQ fasteignir og Víetnam Market.

Greint hefur verið frá því að um 30 ætlaðir þolendur mansals af hálfu Quang Le búi nú við mikla óvissu, þar sem aðeins nokkrir mánuðir séu eftir af gildistíma dvalarleyfa þeirra hérlendis. Umræddir einstaklingar störfuðu hjá fyrirtækjum í eigu Quang Le.