Kvenmannsbuxur sem áttu að fara til Chalamet

Buxurnar vöktu mikla athygli í tónlistaratriði Lamar enda kannski ekki týpískur klæðnaður rappara. Nú hefur Taylor McNeil, stílisti bæði Kendrick Lamar og Timothée Chalamet, greint frá því að gallabuxurnar, sem eru frá fatamerkinu Celine, áttu upphaflega að fara til leikarans en ekki rapparans.

Þó nokkur hæðarmunur er á mönnunum tveimur, Chalamet er um 1,78 metrar á hæð meðan Lamar er 1,65 metrar á hæð. Buxurnar voru ansi síðar á rapparanum og náðu niður á gólf þannig hann gekk á skálmunum. Hins vegar smellpössuðu þær á mjaðmir rapparans þrátt fyrir að hann noti vanalega stærð 33 og buxurnar hafi verið í stærð 29.

Eftir flutning Lamar hafa buxurnar sem kosta um 1.300 Bandaríkjadali (rúmlega 180 þúsund krónur) selst upp hjá Celine. 

Auk buxnanna var Lamar í sérsaumuðum blá­um leður-há­skólajakka frá Martine Rose sem á stóð rauðum stöfum GLORIA. Nafnið Gloria er vísun í lokalagið á nýjustu plötu rapparans, GNX.

Þá var hann með svarta derhúfu, svarta leðurhanska og í hvítum strigaskóm. Þeir sem veðjuðu fyrir tónleikana á að hann myndi klæðast hettupeysu sátu því eftir með sárt ennið.

Um hálsinn skartaði hann demantskeðju með stafnum „a“ sem var greinileg vísun í hans vinsælasta lag um þessar mundir, „Not Like Us“ þar sem Kenrick skýtur föstum skotum að Drake og gefur til kynna að Drake sækist í stelpur sem eru „a minor“ eða undir lögaldri.