Til­finninga­rík stund þegar Taílendingarnir komust heim

Pongsak Thaenna, Sathian Suwannakham, Watchara Sriaoun, Bannawat Saethaoog Surasak Lamnao höfðu allir verið við vinnu í Suður-Ísrael þegar þeim var rænt í árás Hamas á Ísrael 7. október 2023.

Í umfjöllun BBC segir að mönnunum hafi verið vel tekið af fjölskyldum sínum þegar þeir lentu í morgun á flugvellinum í Bangkok.

„Ég veit ekki hvernig ég get komið því í orð,“ sagði Pongsok, einn mannanna. Hann þakkaði öllum embættismönnunum sem unnu að því að hjálpa þeim að losna úr haldi. Hann sagði þá alla fimm mjög glaða og þakkláta að vera komna aftur heim.

Maris Sangiampongsa utanríkisráðherra Taílands sagði það hvetjandi að verða vitni að heimkomu þeirra eftir að þeim var sleppt úr haldi þann 30. janúar.

Stanslaus þjáning

„Ég held ég vilji ekki að hann fari svo langt að heiman aftur,“ sagði Somboon Saethao, faðir Bannawat, við heimkomuna og að hann væri svo hamingjusamur að sjá son sinn. Bannawat flutti til Ísrael níu mánuðum áður en honum var rænt til að þéna betur fyrir fjölskyldu sína. Eiginkona hans sagði í viðtali við BBC að það hafi verið stanslaus þjáning á meðan maðurinn hennar var í haldi í fimmtán mánuði.

Boonsong Tapchaiyut, vinnumálaráðherra Taílands, tilkynnti við heimkomu þeirra að hver þeirra myndi fá um 2,5 milljón í bætur og um 127 þúsund krónur í mánaðarlaun þar til þeir verða 80 ára svo þeir þurfi ekki að snúa aftur til Ísrael.

Sjá einnig: Til­finningarnar réðu för þegar fjöl­skyldur hittu gíslana

Í frétt BBC um málið segir að alls hafi 46 taílenskir vinnumenn verið drepnir frá því í október 2023, meirihlutinn í árás Hamas en einhverjir í loftárásum Hezbollah í Líbanon. Hamas tók í október 251 gísl og drap um 1.200 manns þegar samtökin réðust inn í Ísrael. Árásin varð til þess að Ísrael réðst inn í Gasa og lét ekki af loftárásum á svæðið fyrr en í síðasta mánuði. Talið er að minnsta kosti 47.500 Palestínumenn hafi látist í stríðinu. Um tveir þriðju allra bygginga á Gasa eru eyðilagðar.

Enn hundruð í haldi

Hamas og Ísrael komust að samkomulagi um vopnahlé 19. janúar. Lausn taílensku gíslanna er ekki hluti af samkomulaginu. Frá því að þau komust að samkomulagi hefur 19 Ísraelum verið sleppt úr haldi frá Gasa og 566 Palestínumenn verið frelsaðir. Við lok fyrsta áfanga vopnahlésins, eftir um þrjár vikur, er búist við því að búið verði að sleppa úr haldi 33 Ísraelum í haldi á Gasa og 1.900 Palestínumönnum sem eru í haldi í Ísrael. Ísraels yfirvöld segja átta af 33 gíslum látna.

Rauði krossinn, sem sér um að taka á móti föngum úr landi, hefur lýst yfir miklum áhyggjum vegna ástands fanga sem er sleppt úr haldi í bæði Ísrael og á Gasa. Einhverjir hafa þurft á spítalavist að halda eftir að þeim er sleppt úr haldi.