Ekki sést síðan í að­draganda gossins í Holu­hrauni 2014

Þetta kemur fram á Facebook-færslu Eldfjalla- og náttúruvárhóps Suðurlands skömmu fyrir klukkan 10. Þar segir að einungis hafi einn smáskjálfti mælst milli klukkan níu og tíu.

Jarðskjálftahrina hófst í Bárðarbungu klukkan 06:08 í morgun og var sá stærsti 4,8 að stærð klukkan rétt rúmlega átta. Nokkrir skjálftar hafa mælst yfir 4 að stærð.

Í færslunni segir að skjálftarnir séu að mestu einangraðir við norðanverða öskju Bárðabungu, undir miðjum jökli. Ekki hafi verið staðfest að um kvikuhlaup sé að ræða, kraftur og þéttni jarðskjálfta sé sterk vísbending um það.

„Álíka skjálftavirkni í Bárðabungu hefur ekki sést síðan í aðdraganda eldgossins í Holuhrauni 2014. Þá stóð yfir mikil skjálftavirkni í um 10 daga áður eldgos hófst,“ segir í færslunni.