Óttaðist að drukkna í eigin blóði og ó­létta eigin­konan gat ekki horft á

Vingegaard lýsir þessu í nýju viðtali við danska ríkismiðilinn DR þar sem eiginkona hans, Trine Marie Vingegaard Hansen, lýsir einnig sinni upplifun.

Slysið varð þegar Vingegaard var ásamt fleiri keppendum á fleygiferð niður brekku og lentu alls tíu manns í árekstrinum. Daninn, sem vann Frakklandshjólreiðarnar tvö ár í röð 2022 og 2023, sást liggja nær hreyfingarlaus eftir slysið, með rifna treyju og blóðugur á bakinu. Hann óttaðist að lífið væri búið.

Hóstaði blóði þegar hann loksins gat andað

„Ég gat ekki andað fyrstu tíu sekúndurnar. Ég vissi því strax að það væri eitthvað að. Þegar ég gat loksins andað aftur þá hóstaði ég upp blóði, svo ég vissi að þetta væri alvarlegt,“ sagði Vingegaard í viðtalinu.

Það voru um þrjátíu kílómetrar í endalínuna þegar slysið varð, og Vingegaard segist hafa fengið slæma tilfinningu skömmu áður en ekki viljað hlusta á hana. Svo kom beygja, reyndar ekki sérlega kröpp, sem hann líkt og fleiri réði ekki við í baráttu um stöðu í keppninni og á slæmum vegi. Hann rann nokkra metra niður vegkantinn.

„Þetta er í fyrsta sinn á ævinni sem ég reyni ekki að fara aftur á hjólið,“ sagði Vingegaard.

„Ég hélt að ég væri með einhverjar innvortis blæðingar, og að ég myndi annað hvort drukkna í mínu eigin blóði eða að mér myndi blæða út. Svo já, þarna hélt ég að þetta væri bara búið,“ sagði Vingegaard.

Ólétt eiginkona og dóttir heima í Danmörku

Fljótlega voru hins vegar liðsfélagar hans og sjúkrafólk mætt á svæðið, og augnabliki síðar var Vingegaard svo kominn upp í sjúkrabíl og á leið á næsta sjúkrahús.

Á meðan á þessu stóð var eiginkona Vingegaard ólétt heima í Lind, litlum bæ fyrir utan Herning, með dótturinni Fridu. Hún sá því slysið fyrst í sjónvarpinu heima hjá sér:

„Ég sagði bara „fokk, fokk, fokk, fokk, fokk, fokk“,“ sagði Trine Marie sem vissi strax að útlitið væri ekki gott. Vinir hennar urðu að segja henni hvað væri að gerast á skjánum því hún vildi ekki sjá meira eða horfa á endursýningar.

Niðurstaðan var þó „aðeins“ sjö brotin rifbein, brotið bringubein, viðbein í nokkrum hlutum, fingurbrot og göt á báðum lungum.

Ákveðinn í að hætta en mætti svo á Tour de France

Trine Marie var þegar lögð af stað á flugvöllinn þegar símtal barst úr herbúðum liðs Jonasar, hálftíma eftir slysið. Þar fékk hún þær upplýsingar að hann væri með meðvitund og í góðum höndum á sjúkrahúsinu.

„Ég var glöð að hann væri á lífi og vonaði að hann væri ekki með neinn heilaskaða. Mér fannst við geta lifað með öllu öðru,“ rifjaði Trine Marie upp.

Hún hélt aftur af tárunum, jafnvel þegar þær Frida voru mættar á sjúkrahúsið og fengu að hitta Jonas sem grét hins vegar mikið.

„Trine var jú ólétt. Það átti ég erfitt með. Sérstaklega að hugsa til þess að þið þyrftuð að lifa án mín,“ sagði Jonas og beindi orðunum til konunnar sinnar.

Jonas Vingegaard lá á sjúkrahúsinu í tólf daga, þar af átta á gjörgæslu. Á þessum tíma var hann staðráðinn í að hætta sem hjólreiðamaður, þrátt fyrir að vera einn sá albesti í heiminum:

„En svo töluðum við áfram um þetta síðar og við vorum sammála um að ég héldi áfram. Þetta er ennþá ástríðan mín,“ sagði Jonas sem útskrifaðist af sjúkrahúsinu 16. apríl og var svo mættur í Frakklandshjólreiðarnar, eða Tour de France, á nýjan leik 29. júní. Hann hafnaði þar í 2. sæti.